اخباراں، سنیپ چیٹاں، ٹوئیٹاں تو لیکر وٹس ایپاں تکر اکو کٹا کُھو لیا جے۔ مینوں ڈر پئیا بھئی کدرے اسی کسے کمے تے نہیں لگن لگے اے سارے کرونا کرونا دی رٹا لائ دے نے۔ پہلا واٹسایپ ویکھیا تے شک جئیا پئیا کے ھورے۔ اک تھاں کافی پئین بیٹھی تے پچھلی میز دی گلاں کن وچ پئین لگ گیاں۔ بندہ اپنی بڈھی نوں آندا پئیا سی میں تے ھمسائ تو اینا امپریس اں کسطرح چئیک چئیک آندی ھے “کرونا” تے اک توں ھے جنوں اپنے بلوڈرائ دی فکر کجھ نہیں کرن دیندی۔ مینوں ککھ پلے نہیں پئیآ۔
چلو جی بکوساں نوں دفعہ کرو۔ ایس کرونا وائرس ساڈا کی پُٹ لینا اسی تے “نہ کرونا” قوم اں۔ بک بک وچ ارسطو تے کم جوان دی موت دی اعلی مثال۔ ھیں جی کی کہیا اسی بڑے کامے اں؟ آھوجی کامے تے اسی آں ۔چلو اک سرکاری دفتر وڑئیے ۔سویرے دفتر جا کے پہلے اخبار پڑھنے آں، فیر سنگھیاں نال چاء دا کُوف تے فیرفائیل کھولنے اں تے وضو دا ٹئیم (نماز نہ وی پڑھنی ھوے وقفہ تے لینا ھے نا) کھان دا ٹئیم، سگرٹ ، تے وچ بچے ٹئیم تے اک ادھی فایل یا میٹنگ یا باس دے آرڈر تے فائیل دیاں پھرتیاں تے فیر چھٹی۔ (کج پورا وی کم کردے نے) ھن تسی آپ دسو ایدھے وچ کتھوں “کرونا” وڑنا ھے۔
اسی تے اپنی حکومتاں تے سیاستداناں نوں “کرونا کرونا” دا رنڈی رولا بڑا ستھرا پانے آں۔ ھن اے چنگا کاروبار بن گیا ھے لوکاں دی روزی روٹی لگی اے۔ ھیں کتھے؟ یار اے شامی 7 وجے تو جہیڑی چاں چاں ٹی وی تے لگدی ھے اے کی ھے؟ ایدھے وچ کوئ دسدا ھے کئیوں کج وی “کرونا” ھوسکدا ھے۔ سارے “نہ کرونا” دی گل کردے نے۔ مگر کدی کدی اک دوجے نوں گال کڈ کے، چنڈ رکھ کے، گلاس بھن کے “کرونا” وی وکھا دیندے نے ۔ تے اس دے بعد جو کلپاں دا “کرونا” چکر کھل دا اے اودے تو شیطان وی پناہ منگدا اے۔ ایہو ایہو جئ کمنٹ اپنا مولوی اوتے رکھن دے چکر وچ آندا ھے کے اوئ اللہ دا نعرہ وی گھٹ۔
وڈے آندے سن جہوجئئ بوتھی اوھو جئی چپیڑاں تے ساڈیاں حکومتاں وی ساڈی بوتھی تے ساڈے وانگ “نہ کرونا” دی چپئیڑ نے۔ کھیسے چوانی نہیں تے کُد کُد لوکاں دے منہ تے ارباب ڈالر مارن دیاں گلاں دا گلھیادھڑ۔ تے فیر ڈرائیوری کر کر قرضہ “کرونا”۔ ھمسائے لڑ دے ھون(افغانستان تو ایران ) تے اوناں نو آنے اں اوے “نہ کرونا نہ” تے سمجھنے اسی بڑا کم “کرونا” اے۔ اگلے آندے نے ھل کاکا آگے لگ۔ ھور تے ھور ٹڈی دل غریب دی فصلاں نوں پے جاے تے “ نا کرونا” جد چوھدری دے فصل نوں پئے تے ھاے چہیتی “کرونا” ۔
اک کم ھے جدھے تے ھر کوئ ادھی سکنٹی “کرونا” نو تیار ھو جاندا ھے۔ کی؟ سوچو؟ اوے یار جد کسے زنانی دے پچھے پینا ھوے تے فیر تسی ساڈی “کرونا” دیاں پھرتیاں چیک کرو۔ زنانی کوئ گل کردے،مرضی دے کپڑے پا لوے، سیاست تے کمنٹ کر دوے - آے ھاے ھاے ساڈی “کرونا” برگیڈ نو سیل پے جاندے نے - ایہو ایہو جئ ننگی گال کڈ دے نے کے زنانی نوں آپ وی پتہ نہ ھوی کے اونوں اللہ نے اے والے حصے وی لاے نے۔ تے اوناں دا اے استمعال وی ھو سکدا ھے۔ جے کوئ ایناں نوں کہہ دوے کے بھئی “نہ کرونا” تے فیر اودی وی ماں بہن نوں وی “کرونا” پے جاندا ھے۔
ھن تسی آپ دسو ایس قوم نوں کرونا کج آکھ کے آپ مرنا ھے۔