2000 کے بعد جب بلوچ قوم پرست تحریک نئی توانائی کے ساتھ مزاحمتی شکل میں سامنے آئی۔ مکران ڈویژن میں دینی مدارس جو بہت کم پیمانے پر موجود تھے اور مقامی لوگوں کے چندے یا مساجد میں نماز جمعہ کے بعد چندہ وغیرہ پر چل رہے تھے، ان کی تعداد میں اضافہ ہوا اس کے ساتھ مدارس البنات جہاں صرف لڑکیوں کو دینی تعلیم دی جاتی ہے بھی پہلی بار دھڑا دھڑ قائم ہونا شروع ہوگئے، اب مکران ڈویژن کے تینوں اضلاع میں شھری علاقوں کے ساتھ خاص طور پر دیہی علاقوں میں بھی ایسے مدارس کی اچھی خاصی تعداد دیکھنے کو ملے گی، ان کو چلانے اور مدارس کے منتظمین کا خرچہ کہاں سے آتا ہے اس پر کبھی غور نہیں کیا گیا یا جان بوجھ کر اس اہم مسلے کو نظرانداز کردیا گیا۔
مکران میں تحریک طالبان
مکران میں تحریک طالبان یا کسی شدت پسند مذہبی گروہ کی براہ راست آمد یا موجودگی کا فی الوقت امکان بہت کم ہے البتہ مذہبی رجحانات کے حامل افراد جو نظریاتی طور پر طالبان سوچ سے قریب ہیں ضلع کیچ اور پنجگور میں کافی عرصے سے موجود ہیں۔ افغانستان میں امریکہ کے خلاف کیچ ضلع سے تعلق رکھنے والے درجنوں نوجوان جھاد کے نام پر مارے گئے اور جب افغانستان پر طالبان کی حکومت آئی تو ان کے والدین کی دستار بندی باقاعدہ ایک تقریب منعقد کرکے کی گئی تھی۔ اس کے علاوہ 2016 کو احمد وال نوشکی میں طالبان کے دوسرے طاقت ور ترین لیڈر یا امیر ملا اختر منصور کی ہلاکت اور تربت میں 2020 کو پولیس کے ہاتھوں جیش العدل سے تعلق رکھنے والے ملا عمرایرانی کی ہلاکت بلوچستان اور مکران ڈویژن میں مذہبی شدت پسندوں کی موجودگی کو ظاہر کرتی ہے۔
تین اضلاع پر مشتمل مکران ڈویژن میں ضلع پنجگور، کیچ اور گوادر کی نسبت ہمیشہ مذہبی رجحانات کے حوالے سے رجعت پسند مذہبی حلقے کے لیے بہتر رہا ہے۔ جہاں بنیاد پرست مذہبی سیاسی جماعت جمعیت علماء اسلام کے کارکنوں کی ایک اچھی خاصی تعداد موجود ہے اور اس کے علاوہ وہاں کیچ کی نسبت مدارس کی قابل ذکر تعداد نائن الیون سے پہلے موجود رہی ہے۔
بلوچستان کے دوسرے بلوچ علاقوں کے برعکس چونکہ مکران ڈویژن قوم پرست نظریات کے حامل ایک سیاسی سماج کے طور پر اپنی الگ پہچان رکھتی ہے، یہاں ہمیشہ قوم پرست رجحان کے حامل سیاست کی بالادستی رہی ہے اس لیے یہ امکان کم ہے کہ مکران مستقبل قریب میں طالبانائزیشن سے متاثر ہوسکتی ہے، البتہ سی پیک منصوبہ اور گوادر پورٹ جیسی اہمیت کے حامل پروجیکٹ اس خطے میں عالمی چپقلش کا سبب بن رہے ہیں، سعودی عرب اور ایران بھی مذہبی نظریات کی بنیاد پر خطے میں اثر انداز ہونے کی کوشش کرتے رہے ہیں، اس تناظر میں یہاں کوئی ہلچل انہونی نہیں ہوگی۔
دوسروں کے لیے شاید قسمت کی ایک مہربان دیوی مگر گوادر ایک ایسا خطہ ہے جو اپنے باسیوں کے لیے ہی ایٹم بم بن سکتا ہے، جغرافیائی اعتبار سے اتنا اہم ہے جتنا اس کے باسیوں نے کبھی سوچا تک نہیں ہوگا۔
قوم پرست سیاست پر گرفت
طاقت ور قوتوں کی کوشش ہوگی کہ ان کے مفادات کی راہ میں حائل وہ خطے کی خالص قوم پرستانہ سیاست کو مذہبی سوچ سے پراگندہ بنائیں جیسا کہ گوادر میں مولانا ہدایت الرحمن کی صورت میں یا اب طالبان کے ساتھ مسلح گروہ کا اتحاد وغیرہ لیکن یہ سوچ مکمل طور پر کامیاب نہیں ہوسکتی۔ یہاں بی ایس او کی سیاسی تربیت آج بھی اپنی جگہ منظم اور مستحکم ہے اسے آسانی سے شکست نہیں دیا جاسکتا۔ اس سے پہلے بھی کچھ ایسی کوششیں کی گئیں جو کارگر نہ ہوئیں، 1990 کی دہائی کے وسط میں نیشنلزم کے خلاف فرقہ وارانہ تفرقہ زکری اور سنی تنازعہ کی صورت پیدا کیا گیا لیکن مضبوط قوم پرست سیاسی سوچ کے سامنے قوم یہ کوشش ناکام ہوئی، مذہبی سیاست کو پروان چڑھانے کے لیے کئی سالوں سے سخت محنت ڈھکی چھپی بات نہیں ہے، اب اسے نیشنل ازم کے خلاف کھل کر استعمال کیا جانے گا، مکران میں یہ کتنی قبولیت پائے گی ابھی واضح نہیں مگر اب اس کے لیے زیادہ دیر انتظار نہیں کرنا پڑے گا۔