لوئر دیرمیں لڑکیوں کے کالج کے باہر تحریک طالبان کا پوسٹر: 'پڑھائی چھوڑ دو ورنہ مار دی جاؤ گی'

لوئر دیرکے علاقے سمر باغ کے گرلز ڈگری کالج کے باہر تحریک طالبان پاکستان کی جانب سے ایک پوسٹر آویزاں کیا گیا ہے جس میں طالبات کو فوری طور پر تعلیم کا سلسلہ منقطع کرنے کا کہا گیا ہے اور ساتھ ہی کہا گیا ہے کہ اگر ایسا نہیں کیا گیا تو طالبات کو قتل کردیا جائے گا۔ پوسٹر میں لکھا گیا ہے کہ ان ہدایات کو نہ ماننے والی طالبات کو موت کی سزا دی جائے گی۔

ڈان اخبار کی خبر کے مطابق کالج کی پرنسپل نے محکمہ ہائیر ایجوکیشن کو کالج کی سیکیورٹی کے حوالے سے خط بھی لکھا ہے جبکہ کالج انتظامیہ نے لوکل انتظامیہ اور پولیس کو بھی اطلاع دے دی ہے۔

دوسری جانب طالبات کے اہل خانہ بھی اپنے بچوں کی زندگیوں کو لے کر پریشان ہیں۔ اور انہوں نے ضلعی انتظامیہ کو اس حوالے سے اپنے خدشات کا اظہار کرتے ہوئے ایکشن لینے کا مطالبہ کیا ہے۔