نیا دور نیوز ڈیسک:۔
امریکا میں طاقتور برفانی طوفان کے باعث 7 ریاستوں میں ہنگامی حالت نافذ کردی گئی،امریکی میڈیا کے مطابق امریکا کی 30 سے زیادہ ریاستوں میں چھ کروڑ سے زیادہ افراد موسم سرما کے ایک بڑے طوفان سے متاثر ہوسکتے ہیں۔
امریکی میڈیا کا کہنا ہے کہ یہ برفانی طوفان گزشتہ 10 برس کا سب سے زیادہ طاقتور طوفان ہوسکتا ہے جس میں کچھ علاقوں میں 40 میل فی گھنٹہ یخ بستہ ہوائیں چلنے اور 10 سالوں میں سب سے زیادہ 15 انچ سے زائد برف پڑنے کی پیش گوئی کی گئی ہے۔
رپورٹ کے مطابق زیادہ تر ریاستوں میں درجہ حرارت نقطہ انجماد سے نیچے ہے، کچھ ریاستوں میں درجہ حرارت منفی 5 ڈگری سے لے کر منفی 29 ڈگری تک ہے جب کہ کینیڈا کی ریاست مینی ٹوبا میں درجہ حرارت منفی 40 ڈگری تک جانے کی پیشگوئی کی گئی ہے۔
برفانی طوفان کے باعث کنساس، میسوری، کینٹکی، ورجینیا، ویسٹ ورجینیا، آرکنساس اور نیو جرسی کے کچھ حصوں میں ہنگامی حالت کا اعلان کر دیا گیا ہے جہاں حکام نے شدید برف باری کی وارننگ جاری کردی ہے۔
طوفان کے نتیجے میں مختلف علاقوں میں سڑکیں بند ہونے کے باعث دفاتر اور تعلیمی ادارے بھی بند کردیے گئے ہیں، ہزاروں پروازیں تاخیر کا شکار یا منسوخ ہوگئیں، ریاست کنساس کی ہائی وے پر ایک روز میں 50 ٹریفک حادثات ہوئے جن میں 20 افراد زخمی ہوچکے ہیں، حکام نے لوگوں کو غیر ضروری سفر نہ کرنے کی ہدایت کردی۔
واضح رہے کہ گزشتہ ہفتے برطانیہ میں بھی شدید برفباری اور بارش سے بڑے پیمانے پر نقصان کا الرٹ جاری کردیا گیا تھا۔ میٹ آفس کی جانب سے ہدایت جاری کی گئی ہے کہ ڈرائیورز سفر سے پہلے مکمل تیاری رکھیں، فاصلے کا خیال اوربرف سے بچاؤ کاسامان ساتھ رکھیں۔
بی بی سی نے اس حوالے سے اپنی رپورٹ میں بتایا کہ برفباری کی وجہ سے 1500 سے زائد پروازیں ملتوی کردی گئی ہیں اور 5 ہزار پروازیں تاخیر کا شکار ہوئیں، مختلف سڑکیں بھی برفباری کے باعث بند ہیں جب کہ کچھ ریاستوں میں اسکول بھی بند کردیے گئے ہیں۔
رپورٹ کے مطابق ایک موسمیاتی ادارے کا بتانا ہے کہ ممکنہ طور پر حالیہ جنوری میں ہونے والی سردی 2011 کے بعد امریکی تاریخ میں جنوری میں ہونے والی سب سے زیادہ سردی ہوگی۔