سوشل میڈیا پر ایک صارف نے ٹویٹ کرتے ہوئے اعلان کیا کہ 23 مارچ کی پریڈ کو منسوخ کر دیا گیا ہے۔
23rd March Parade has been cancelled.
— Fidato (@tequieremos) March 13, 2020
واضح رہے کہ دنیا بھر میں کرونا وائرس کے پھیلاؤ کے خطرے کے پیش نظر بڑے ایونٹس کو منسوخ کیا جا رہا ہے، اس سلسلے میں پاکستان کرکٹ بورڈ نے ملک میں جاری پاکستان سپر لیگ کے باقی میچز تماشائیوں کے بغیر کرانے کا اعلان کیا ہے۔ اور اب پاکستان فوج نے بھی یوم پاکستان پر منعقد کی جانے والی پریڈ کو منسوخ کر دیا ہے۔
کرونا وائرس سے اب تک مجموعی طور پر پانچ ہزار سے زائد افراد ہلاک ہو چکے ہیں اور ایک سو چوبیس ممالک میں ایک لاکھ تینتیس ہزار سے زائد افراد متاثر ہیں۔
کرونا وائرس سے چین میں تین ہزار ایک سو انہتر سے زائد افراد چل بسے، ایران میں چار سو انتیس، سپین میں چھیاسی، جنوبی کوریا میں چھیاسٹھ، اور فرانس میں اڑتالیس سے زائد افراد ہلاک ہو چکے ہیں۔ امریکہ میں چالیس، اور برطانیہ میں آٹھ افراد ہلاک ہوئے، بھارت میں بھی کرونا وائرس سے ایک ہلاکت کی تصدیق ہو چکی ہے۔
اٹلی میں کرونا وائرس سے ہلاکتوں میں مسلسل اضافہ ہو رہا ہے اور چوبیس گھنٹوں کے دوران اس وائرس کے کیسز کی تعداد میں 23 فیصد اضافہ ہوا ہے۔ اٹلی میں ایک سو نواسی افراد کی ہلاکت کے ساتھ مرنے والوں کی تعداد ایک ہزار سولہ ہوگئی ہے۔ ایک پاکستانی شہری بھی اٹلی میں ہلاک ہوا ہے۔ اٹلی میں دکانیں اور سکول بند ہیں، سپتالوں میں بستروں کی کمی کے پیش نظر محکمہ صحت نے زیادہ عمر والے افراد کو آئی سی یو میں نہ رکھنے کا مشورہ دیا ہے۔
پاکستان میں کرونا کیسز کی تعداد21 ہو گئی ہے اور سندھ اور بلوچستان میں تعلیمی ادارے بند کر دیے گئے ہیں جبکہ پنجاب میں میڈیکل ایمرجنسی کا اعلان کر دیا گیا ہے۔
یہ بھی واضح رہے کہ 23 مارچ کی پریڈ کی تیاریاں کئی ہفتے پہلے شروع کر دی جاتی ہیں۔ اس پریڈ میں پاکستان کی تینوں افواج کے دستے اپنی جنگی طاقت کا مظاہرہ کرتے ہیں۔
چند دن قبل 23 مارچ کی پریڈ کی تیاریوں میں مصروف پاک فضائیہ کا جنگی طیارہ بھی اسلام آباد میں گر کر تباہ ہو گیا تھا جس میں ونگ کمانڈر نعمان اکرم شہید ہو گئے تھے۔