نیا دور نیوز ڈیسک:۔
وزیر خزانہ محمد اورنگزیب نے غیر ملکی اخبار ”نکی ایشیا“ کو انٹرویو دیتے ہوسے کہا کہ موجودہ آئی ایم ایف پروگرام آخری ہو گا۔ پاکستان میں مہنگائی میں نمایاں کمی آئی ہے جو مئی 2023ء میں 38 فیصد تھی اور اس ماہ 3 فیصد تک آ گئی ہے۔ سرکاری خبررساں ادارے اے پی پی کے مطابق غیرملکی اخبار ”نکی ایشیا“کو انٹرویو دیتے ہوئے انہوں نے کہا کہ پاکستان کی آئی ایم ایف سے بیل آؤٹ کے بعد کریڈٹ ریٹنگ میں بہتری آئی ہے۔
پاکستان میں اقتصادی اصلاحات سے مہنگائی میں کمی آئی ہے، پاکستان چین کی مالیاتی منڈیوں تک رسائی کے لیے تیار ہے، پاکستان کے اپنے یوآن بانڈ چینی مارکیٹ تک رسائی حاصل کرنے کے لیے تیار ہیں، رواں مالی سال کے آخر تک پانڈا بانڈ کا ابتدائی اجراء متوقع ہے۔
محمد اورنگزیب نے کہا کہ ہانگ کانگ میں کارپوریٹ سٹاک لسٹنگز کی حوصلہ افزائی کرنے کے لیے تیار ہیں، پاکستان چین مشترکہ منصوبے کی ہانگ کانگ میں لسٹنگ متوقع ہے، پاک چین تعلقات کو مزید مستحکم کرنے کے لیے سی پیک ایک اہم قدم ہے، پاکستان میں چینی شہریوں کے لیے سکیورٹی اقدامات جاری ہیں، میڈیا میں نظر آنے والی صورتحال سے زمینی صورتحال کہیں بہتر ہے۔
وزیرخزانہ نے کہا کہ آئی ایم ایف کے 25ویں پروگرام کے بعد ترقی کے ماڈل پر توجہ مرکوز کی ہے، یہ آخری آئی ایم ایف پروگرام ہوگا، برآمدی نمو مستحکم، غیرملکی سرمایہ کاری کو راغب کرنے، عالمی منڈیوں میں جانے کے لیے کوشاں ہیں، بیلٹ اینڈ روڈ انیشی ایٹو کا فلیگ شپ منصوبہ ہے۔
پاکستان اور چین کے تعلقات کو مزید مستحکم کرنے کے لیے سی پیک اہم قدم ہے، پاکستان میں چینی شہریوں کے لیے سکیورٹی اقدامات جاری ہیں، چینی شہریوں سمیت تمام غیرملکیوں کی سکیورٹی کو اہمیت دیتے ہیں۔