وزیر برائے موسمیاتی تبدیلی شیری رحمان نے اس بات کی تصدیق کی ہے کہ پاکستان کا ایک تہائی حصہ سیلاب سے متاثر ہوا ہے۔ سندھ اور جنوبی پنجاب سب سے زیادہ متاثر ہوئے ہیں، جب کہ بلوچستان بھی نمایاں طور پر متاثر ہوا ہے۔ سندھ میں 1288 ملی میٹر بارش ہوئی ہے جب کہ ماہانہ اوسط بارش 46 ملی میٹر ہے۔ یہ پاکستان میں تین دہائیوں میں سب سے زیادہ بارشیں ہیں۔ بارش میں تقریباً 592 فیصد اضافہ ہوا ہے۔
محققین کا کہنا ہے کہ اس کی وجہ غیر معمولی گرمی کی لہریں ہوسکتی ہیں۔ اپریل اور مئی میں پاکستان کے اکثر میدانی علاقوں میں درجہ حرارت 40 ڈگری سینٹی گریڈ سے تجاوز کر گیا تھا۔ سیلاب کی ایک اور وجہ موسمیاتی تبدیلی کو سمجھا جاتا ہے۔ اگرچہ پاکستان عالمی گرین ہاؤس گیسوں کے اخراج کا ایک فیصد سے بھی کم پیدا کرتا ہے، لیکن اس کا شمار ایسے 10 سرفہرست ممالک میں ہوتا ہے، جو موسمیاتی تبدیلیوں کے اثرات سے سب سے زیادہ خطرے میں ہیں۔
بہت سے عوامل سیلاب میں حصہ ڈالتے ہیں، لیکن موسمیاتی تبدیلی کی وجہ سے گرم ماحول بہت زیادہ بارش کا امکان پیدا کرتا ہے۔ پاکستان میں قطبی خطوں سے باہر گلیشیئرز کی سب سے زیادہ تعداد بھی ہے۔ زیادہ درجہ حرارت پگھلنے والی برف سے زیادہ پانی کے بہاؤ کا باعث بنا ہے۔ لیکن اس کے ساتھ ساتھ یہاں دوسرے عوامل بھی ہیں جنہوں نے تباہی کے پیمانے میں حصہ ڈالا ہے۔ ان میں خاص طور پر حکومت کی نظر اندازی کے باعث جنگلات کی کٹائی، نیز 2010 میں آخری بڑے سیلاب سے سبق حاصل نہ کرتے ہوئے حکومت کی جانب سے زیر زمین نکاسی کے راستوں کو برقرار رکھنے اور نقل مکانی کے مناسب اور قبل از وقت انتظامات کرنے میں ناکامی نمایاں طور پر شامل ہیں۔
ان سیلابوں کے بعد کے اثرات بھی شدید ہیں۔ پاکستان کو 30 بلین ڈالر کا نقصان پہنچا ہے جب کہ اس کی معیشت پہلے ہی بحران کا شکار ہے۔ فصلوں اور مویشیوں پر منفی اثرات پڑنے سے درآمدات میں اضافہ ہوگا اور برآمدات میں مزید کمی آئے گی جو پاکستان کو مزید معاشی بحران کی طرف لے جائے گی۔ سیلاب کے مکمل اثرات سے پہلے ہی پاکستان میں مہنگائی 47 سال کی بلند ترین سطح پر پہنچ چکی ہے۔
بتایا گیا ہے کہ 3.6 ملین ایکڑ فصلیں متاثر ہوئی ہیں۔ تقریباً 800,000 مویشی ضائع ہو چکے ہیں۔ پاکستان کی تقریباً 40 فیصد افرادی قوت روزگار کے لئے زراعت پر انحصار کرتی ہے، جب کہ زرعی شعبہ پوری معیشت کا پانچواں حصہ ہے اور یہ زرعی شعبہ اس وقت شدید بدحالی کا شکار ہے۔ پاکستان بزنس فورم کے نائب صدر احمد جواد نے کہا کہ کئی اہم علاقوں میں کپاس کی فصل اور سبزیاں مکمل طور پر ختم ہو چکی ہیں۔
وزیر منصوبہ بندی احسن اقبال نے ابتدائی تخمینوں کا حوالہ دیتے ہوئے کہا ہے کہ طوفانی بارشوں سے پاکستان کی کپاس کی نصف فصل کو نقصان پہنچا ہے۔ یہ ملک کپاس پیدا کرنے والا پانچواں سب سے بڑا ملک ہے، جو عالمی پیداوار کا 5 فیصد ہے۔ نقصان دنیا کی کپاس کی سپلائی کو مزید سکیڑ سکتا ہے۔ اگلے سال کی گندم کی فصل کی بوائی، جو اکتوبر 2022 میں شروع ہوگی، ایک اور چیلنج ہوگا۔ وزیر اعظم شہباز شریف نے گذشتہ ماہ پارلیمنٹ میں کہا تھا کہ پاکستان پہلے ہی گندم کی درآمد پر روس کے ساتھ بات چیت کر رہا ہے۔ سیلاب سے پہلے بھی ملک کو تقریباً 26 لاکھ ٹن گندم کی کمی کا سامنا تھا۔ ماہر اقتصادیات عمار خان کے اندازے کے مطابق، سیلاب سے براہ راست فصلوں کا نقصان 2.3 بلین ڈالر ہے۔
اس سلسلے میں حکومت کی جانب سے ایران اور افغانستان سے سبزیوں اور دیگر اشیا کی درآمد کے لئے اقدامات کیے جا رہے ہیں۔ اس کے بعد حکومت نے بھارت کے ساتھ تجارت کے لئےعوامی رائے عامہ کا بھی امتحان لیا، لیکن اس دشمن ریاست کے ساتھ معمول پر آنے کے خلاف عوامی دباؤ کی وجہ سے وقتی طور پر پیچھے ہٹ گئی۔ تاہم، سیلابی پانی ملک بھر میں رسائی کو محدود کر رہا ہے، جس میں 100 سے زیادہ پل اور تقریباً 3000 کلومیٹر سڑکیں تباہ ہو چکی ہیں۔ پاکستان بزنس فورم کے نائب صدر جواد نے کہا، " سیلاب نے متعدد پل توڑ دیے ہیں اس لئے ایران سے سپلائی صوبہ پنجاب میں پاکستان کے مرکزی آبادی کے مرکز تک نہیں پہنچے گی۔"
تجارت کے علاوہ حکومت استعماری ممالک اور اداروں سے غیر ملکی فنڈنگ کی اپیل میں سرگرم ہے۔ تاہم، جیسا کہ اس سے پہلے لاتعداد بار دیکھا جا چکا ہے، جن میں 2005 کا زلزلہ اور 2010 کا سیلاب بھی شامل ہیں، کہ دراصل یہ پاکستان کے مخلص مسلمان ہی ہیں جو اپنی اپنی سطح پر ریلیف فراہم کرنے کوششیں کر رہے ہیں۔ حکومت ان کوششوں میں زیادہ تر غیر حاضر ہے۔ البتہ یہ ضرور دیکھنے میں آیا ہے کہ آزمائش کے ان تمام دنوں میں سیاسی منظر نامے میں دونوں بڑی سیاسی جماعتوں کی آپسی چپقلش عروج پر رہی ہے۔ ایک دوسرے پر الزام درازی کرنے اور ایک دوسرے کو ذلت آمیز القابات سے نوازنے میں کوئی کمی دیکھنے میں نہیں آئی۔ ہونا تو یہ چاہیے تھا کہ اس کڑے وقت میں یہ تمام سیاست دان اپنے آپسی اختلافات بھلا کر اس مسٔلے کو حل کرنے میں اکٹھے اور یکجا ہو جاتے۔ لیکن کسی سیاسی لیڈر کی جانب سے یہ بات ایک تجویز کے طور پر بھی پیش نہیں کی گئی۔ اور وہ اپنی اپنی سیاسی انا اور طوفان بد تمیزی میں اسی طرح مگن رہے جیسے سیلاب کے مسٔلے سے پہلے چلے آ رہے تھے۔ عمران ہوں یا نواز اور شہباز، سب نے ثابت کیا کہ انہیں بس یہ سیاسی جنگ جیتنی ہے اور اقتدار کا حصول ہی وہ مقصد ہے جس کے گرد ان کی جدوجہد گھومتی ہے، عوام کے مسائل سے انہیں نہ ہونے کی حد تک واسطہ ہے۔
آئیے غور کریں کہ مدینے میں جب قحط پڑا تو اس وقت مسلمانوں کے حکمران یعنی خلیفہ کا کیا کردار تھا۔ یہ قحط جو خشک سالی کے بعد پیدا ہوا، اس وقت حضرت عمر فاروقؓ خلیفہ تھے۔ انہوں نے اس وقت کے کفار کو مدد کے لئے نہ پکارا بلکہ پوری امت اسلامیہ سے مدد مانگی۔ اس وقت اسلامی ریاست اس قدر وسیع تھی کہ غیر متاثرہ علاقوں سے بھاری امداد پہنچیں۔ ابن کثیر نے اپنی کتاب البدایہ والنہایہ میں نقل کیا ہے کہ عمرؓ نے بصرہ میں ابو موسیٰ اشعریؓ کو لکھا: "محمدﷺ کی امت کی مدد کرو"۔ اور انہوں نے عمرو بن العاصؓ کو مصر میں لکھا کہ "امت محمدﷺ کی مدد کرو۔" چنانچہ ان میں سے ہر ایک نے اناج اور ہر قسم کے کھانے پینے کی چیزوں سے لدا ہوا بہت بڑا قافلہ بھیجا"۔
ایک اسلامی ریاست اس قسم کے کسی بھی ملک گیر بحران کا مقابلہ اسلامی عقیدے کی بنیاد پر کرتی ہے اور اللہ سبحانہ وتعالیٰ کی بھیجی گئی راہنمائی کی روشنی میں اسے حل کرتی ہے جس نے مسلمانوں کو ایک واحد امت بنا کر بھیجا ہے۔ اسی طرح وہ حرام پر نہیں بلکہ ضروریات پر خرچ کرتی ہے۔
اسی طرح اسلامی ریاست مقررہ شرعی محصولات سے فنڈز اکٹھے کرتی ہے جیسے تجارتی مال پر زکوٰۃ، زرعی زمینوں پر خراج اور توانائی اور معدنیات کی فروخت سے حاصل ہونے والی آمدنی وغیرہ۔ لیکن جہاں ان جیسے شرعی محصولات سے اکٹھے کیے جانے والے فنڈز ناکافی ہوں تورسولؐ اللہ کے اس حکم پر عمل کیا جاتا ہے : "نہ نقصان پہنچانا ہے اور نہ ہی نقصان اٹھانا ہے"۔ اس صورتحال میں اگر لوگوں سے قرض لیے بغیر نقصان کو روکنا ممکن نہ ہو تو اس حکم کے تحت صاحب ثروت لوگوں سے قرض لیا جاتا ہے۔ پھر اسلامی ریاست کے حکمران یعنی خلیفہ کو مالداروں پر ان کی جمع شدہ اضافی دولت پر ٹیکس لگانے کا اختیار بھی حاصل ہوتا ہے، کیونکہ نقصان کو روکنا مجموعی طور پر امت پر فرض ہے، اور خلیفہ امت کے امور کا نگہبان ہے۔ لہٰذا حکمران ہنگامی حالات میں اس قسم کے اقدامات لے سکتا ہے۔