نجی ٹی وی چینلوں کے پروگرام میں شاہد خاقان سے سوال کیا گیا کہ پیپلز پارٹی اور ن لیگ کے اچھے تعلقات ہیں لیکن لیگی رہنما طلال چوہدری کی جانب سے آصف علی زرداری پر سخت تنقید کی جا رہی ہے۔
جس پر شاہد خاقان عباسی نے کہا کہ طلال چوہدری پارٹی کی نمائندگی نہیں کرتے۔ انہوں نے کہا کہ طلال چوہدری اور آصف علی زرداری میں بہت فرق ہے۔ ہماری پارٹی میں لاکھوں لوگ ہیں بے شک وہ رکن اسمبلی تھے۔
اینکر کی جانب سے حیرانگی کا اظہار کرتے ہوئے سابق وزیر اعظم سے سوال کیا گیا کہ آپ طلال چوہدری کو جانتے ہیں نا؟ جس پر شاہد خاقان عباسی نے کہا کہ بالکل جانتا ہوں،لیکن اگر وہ کوئی بات کرتے ہیں تو وہ پارٹی کی نمائندگی نہیں ہوگی۔
ن لیگ کے کروڑوں ممبر ہیں۔ ہماری پارٹی کسی کے بارے میں گھٹیا بات نہیں کرتی۔ انہوں نے واشگاف الفاظ میں کہا طلال چوہدری کی کوئی حیثیت نہیں ،وہ پارٹی کی نمائندگی نہیں کرتے۔
https://youtu.be/SOITLtc77qA
دوسری جانب مسلم لیگ ن کے رہنما طلال چوہدری نے آصف زرداری اور بلاول بھٹو زرداری کے بارے میں اپنے غیر اخلاقی بیان کی وضاحت دیتے ہوئے کہا ہے کہ آصف علی زر داری اور بلاول بھٹو زر داری بارے غیر اخلاقی بیان نہیں دینا چاہیے تھا ۔
اپنے بیان میں طلال چوہدری نے کہا کہ انہیں اس بیان پر افسوس ہے، ایسا نہیں کہنا چاہیے تھا لیکن یہ بیان پیپلز پارٹی کے شریف خاندان کے بارے میں کہے گئے نازیبا جملوں کا رد عمل تھا۔
طلال چوہدری نے کہا کہ پیپلز پارٹی ان کے بیان کے پیچھے نہ چھپے بلکہ یہ بتائے کہ اس نے پیسے سے ووٹ کیوں خریدے؟