خیال رہے کہ نادیہ خان چند دن قبل شرمیلا فاروقی کی والدہ کے ہمراہ ایک ویڈیو بنائی تھی جو سوشل میڈیا پر وائرل ہو چکی ہے۔
اس نامناسب رویے پر لوگ نادیہ خان پر سخت تنقید کر رہے ہیں، وہیں شرمیلا فاروقی نے بھی برہمی کا اظہار کرتے ہوئے ان کیخلاف قانونی کارروائی کا عندیہ دیا ہے۔
شرمیلا فاروقی نے کہا ہے کہ نادیہ خان کا رویہ سستی شہرت کا طریقہ تھا۔ انھیں ایک بزرگ خاتون کے ساتھ نامناسب انداز میں ویڈیو بنانے سے قبل کچھ شرم کرنی چاہیے تھی۔
ان کا کہنا تھا کہ میں نے نادیہ خان کو مسیج کیا تو اپنے رویے پر نادم ہونے کی بجائے انہوں نے کہا کہ میں نے کوئی غلط کام نہیں کیا اور نہ ہی آپ کی والدہ سے نامناسب سوال پوچھا ہے، اس لئے ان کے خلاف واویلا بند کریں۔
View this post on Instagram
رکن سندھ اسمبلی نے نادیہ خان کے رویے پر اظہار افسوس کرتے ہوئے کہا کہ اگر وہ میری والدہ کے بجائے کسی اور خاتون کے ساتھ بھی ایسی ویڈیو بناتیں تو بھی ان کے خلاف ایکشن لیتی۔
پیپلز پارٹی کی رہنما کا کہنا تھا کہ میں شوبز سے وابستہ لوگوں کی بہت عزت کرتی ہوں۔ فنکار برادری سخت محنت طلب کام کرتے ہیں مگر نادیہ خان کا رویہ ناقابل برداشت تھا۔ کیوں کہ ان کی والدہ اس وقت مشکل وقت سے گزر رہی ہیں۔
شرمیلا فاروقی کا کہنا تھا کہ 3 ماہ قبل ہی ان کے والد انتقال کر گئے تھے اور ان کی عمر رسیدہ والدہ شوہر کی وفات کے بعد پہلی بار کسی شادی کی تقریب میں گئی تھیں مگر نادیہ خان نے ان کے ساتھ میک اپ کے معاملے پر نامناسب انداز میں ویڈیو بنائی۔
شرمیلا فاروقی نے اعلان کیا کہ وہ نادیہ خان کے خلاف قانونی کارروائی کریں گی، وہ وفاقی تحقیقاتی ادارے (ایف آئی اے) کے سائبر کرائم کو تحریری درخواست دیں گی جب کہ انہیں عدالت سے بھی رجوع کرنا پڑا تو بھی وہ پیچھے نہیں ہٹیں گی۔