سانحہ مری سے قبل وزیراعظم آفس کو شدید برفباری آگاہ کر دیا گیا تھا، محکمہ موسمیات کی رپورٹ میں انکشاف

محکمہ موسمیات کی رپورٹ میں انکشاف کیا گیا ہے کہ سانحہ مری سے دو دن پہلے وزیراعظم آفس اور این ڈی ایم اے کو شدید برفباری سے سڑکوں کی بندش کے حوالے سے ہائی الرٹ کیا گیا تھا۔

نیا دور میڈیا کے پاس موجود محکمہ موسمیات کی مصدقہ رپورٹ میں انکشاف ہوا ہے کہ مری سانحے سے دو دن پہلے وزیراعظم آفس اور قدرتی آفات سے نمٹنے کیلئے بنائے گئے قومی ادارے این ڈی ایم اے کو ہائی الرٹ کیا گیا تھا کہ وہاں شدید برفباری سے سڑکیں بند ہو سکتی ہیں۔

رپورٹ میں کہا گیا ہے کہ مری کی خراب صورتحال سے متعلق وزیراعظم آفس سمیت متعلقہ اداروں کو دو روز قبل ہی الرٹ کر دیا گیا تھا۔ مری میں 5 جنوری سے 8 جنوری تک 30.5 انچ کی برفباری ریکارڈ کی گئی تھی۔

محکمہ موسمیات نے پانچ جنوری کو ایڈوائزری جاری کی تھی جس میں واضح طور پر بتایا گیا تھا کہ شدید برفباری کے باعث سڑکیں بند ہو سکتی ہیں۔ رپورٹ کے مطابق بروقت اطلاع دے کر بتایا گیا تھا کہ مری، نتھیا گلی، کاغان اور گلیات سمیت مختلف علاقوں میں شدید برفباری ہوگی۔

محکمہ موسمیات کے مطابق موسم سے متعلق ایوی ایشن ڈویژن، پی ڈی ایم اے، ایس ڈی ایم اے اور وزارت موسمیاتی تبدیلی کو آگاہ کیا گیا تھا۔ وزارت آبی وسائل، وزارت فوڈ سکیورٹی، ارسا، چیئرمین ایف ایف سی اور محکمہ موسمیات کے ریجنل دفاتر کو بھی یہی اطلاع دی گئی تھی۔

رپورٹ کے مطابق مری میں 7 اور 8 جنوری کے درمیان 16.5 انچز برفباری ریکارڈ کی گئی تھی۔ محکمہ موسمیات نے تمام متعلقہ اداروں کو بروقت اقدامات کرنے کی بھی ہدایت کی تھی۔