میٹا نے اپنے نئے ٹیکسٹ فرسٹ سوشل میڈیا پلیٹ فارم تھریڈز کا ویب ورژن لانچ کردیا۔
فیس بک اور انسٹاگرام کی مالک کمپنی میٹا نے کہا کہ تھریڈز کے صارفین اب اپنے کمپیوٹرز سے اس کی ویب سائٹ پر لاگ ان کرکے مائیکروبلاگنگ پلیٹ فارم تک رسائی حاصل کر سکیں گے۔
میٹا نے کہا کہ کمپنی آنے والے ہفتوں میں ویب کے تجربے میں مزید فعالیت کا اضافہ کرے گی۔
وسیع پیمانے پر متوقع رول آؤٹ سے تھریڈز کو پاور صارفین جیسے برانڈز، کمپنی اکاؤنٹس، مشتہرین اور صحافیوں کے درمیان وسیع پیمانے پر قبولیت حاصل کرنے میں مدد مل سکتی ہےجو اب پلیٹ فارم کو بڑی سکرین پر استعمال کر کے فائدہ اٹھا سکتے ہیں۔
رواں سال 6 جولائی کو ایکس (ٹوئٹر) کے مقابلے میں میٹا کے بانی مارک زکربرگ نے نئی ایپ ’ تھریڈز‘ متعارف کی تھی۔ ایپ متعارف ہونے کے کچھ دنوں کے اندر ہی 100 ملین سے زائدصارفین نے اس پر سائن اپ کرلیا تھا۔
لیکن 10 اگست کو تجزیاتی پلیٹ فارم سیمیلر ویب کی ایک رپورٹ کے مطابق، صرف ایک ماہ میں ہی اینڈرائیڈ ایپ پر اس کے یومیہ فعال صارفین کی تعداد 49.3 ملین سے کم ہو کر 10.3 ملین رہ گئی۔
دریں اثنا، تھریڈز انتظامیہ ایپ میں نئی خصوصیات شامل کرنے کے لیےتیزی سے کام کر رہی ہے۔ حالیہ اپ ڈیٹس میں تھریڈز اب اکاؤنٹس کے لیے پوسٹ نوٹیفیکیشن سیٹ کرنے اور انہیں ایک قسم کی تاریخی فیڈ میں دیکھنے کی صلاحیت پیش کرتے ہیں۔
اور متوقع اپ ڈیٹس میں تھریڈز جلد ہی سرچ آپشن میں تبدیلیاں متعارف کرائے گا جس میں صارف صرف اکاؤنٹس سرچ کرنے کے بجائے مخصوص پوسٹیں بھی سرچ کر سکتاہے۔
پچھلے ہفتے میٹا نے تھریڈز کے لیے کئی نئی خصوصیات متعارف کروائیں، جن میں انسٹاگرام ڈائریکٹ میسجز پر براہ راست پوسٹس شیئرنگ، تصاویر اور ویڈیوز کے لیے اپنی مرضی کے مطابق Alt-text، اور کسی کے اکاؤنٹ کو ٹیگ کرنے کے لیے بٹن شامل ہیں۔