9 مئی کو ملک بھر میں ہونے والے جلاؤ گھیراؤ کے واقعات میں ملوث ہونے کے تناظر میں بیرون ممالک جانے سے روکنےکے لیے عمران خان سمیت 600 سے زائد پی ٹی آئی رہنماؤں کے نام نو فلائی لسٹ میں شامل کیےگئے ہیں۔
ذرائع کے مطابق عمران خان اور ان کی اہلیہ بشریٰ بی بی کا نام نو فلائی لسٹ میں شامل کیا گیا ہے۔ان کے علاوہ سابق ڈپٹی اسپیکر قاسم سوری، اسد عمر، اسد قیصر، مراد سعید، ملیکہ بخاری، فواد چوہدری، حماد اظہر، یاسمین راشد، اسلم اقبال کے نام بھی نو فلائی لسٹ میں شامل ہیں۔
ذرائع کا کہنا ہےکہ بیرون ممالک جانے سے روکنےکے لیے پی ٹی آئی رہنماؤں کے نام ایف آئی اے کی پروونشل نیشنل آئیڈینٹیفکیشن لسٹ ( پی این آئی ایل) میں ڈالےگئے ہیں۔
وزارت داخلہ کی متعلقہ حکام کو لسٹ میں شامل افراد کو بیرون ملک نہ جانے دینے کی ہدایت جاری کی گئی ہے اور کہا گیا ہے کہ ان افراد کو کسی صورت بیرون ملک نہ جانے دیا جائے۔ تمام ارکان کے نام ملک تمام ہوائی اڈوں اور ایگزٹ پوائٹس پر فراہم کردیئے گئے۔
واضح رہےکہ گزشتہ 3 روز میں بعض عہدیداروں نے بیرون ممالک جانےکی کوشش بھی کی۔ بیرون ممالک جانےکی کوشش کرنے والے پی ٹی آئی ارکان اور عہدیداروں کو ہوائی اڈوں پر روکا گیا۔ ان کو بیرون ممالک سفر سے روکنےکے لیے نام پولیس، سی ٹی ڈی اور خفیہ اداروں نے ارسال کیے تھے۔
گزشتہ روز تحریک انصاف کی سابق ایم این اے صائمہ ندیم کو بیرون ملک جانے سے روک دیا گیا۔جناح انٹرنیشنل ائیرپورٹ پر صائمہ ندیم کو غیر ملکی پرواز سے آف لوڈ کیا گیا۔
پی ٹی آئی رہنما صائمہ ندیم غیرملکی ائیرلائن کی پرواز EK-503 سے ٹورنٹو جارہی تھیں۔ ایف آئی اے نے پرواز کے جانے تک صائمہ ندیم کوانٹرنیشنل ڈیپارچرمیں روکے رکھا۔ بعد ازاں صائمہ ندیم کو ائرپورٹ پولیس اسٹیشن منتقل کر دیاگیا۔