سوڈان کے علاقے دارفور میں سعودی ہسپتال پر باغی فورسز کے حملے میں 70 افراد جاں بحق ہوگئے۔
عالمی ادارہ صحت ( ڈبلیو ایچ او) کے سربراہ نے بیان میں کہا کہ باغی فورسز نے سعودی ٹیچنگ میٹرنل ہسپتال کو نشانہ بنایا۔ حملے میں اب تک 70 افراد کے مرنے کی تصدیق ہوئی ہے۔ سعودی ٹیچنگ ہسپتال پورے علاقے میں کام کرنے والا واحد ہسپتال تھا جو حملے میں تباہ ہوگیا۔ ہسپتال حملے کے بعد کافی بڑے علاقے علاج کی سہولیات کے حوالے سے بڑے بحران کا سامنا ہوگا۔
سوڈانی حکام کے مطابق ہسپتال کونشانہ بنانا باغی فورسز کی جانب سے مسلسل کیے جانے والے حملوں کی کڑی ہے۔ باغی تیل کی تنصیبات سمیت مختلف جگہوں اور علاقوں پر حملے کرچکے ہیں۔ ہسپتال حملے میں اموات میں اضافے کا خدشہ ہے۔
دوسری جانب سعودی عرب نے سوڈان میں ہسپتال پرحملے کی شدید مذمت کی ہے۔ سعودی وزارت خارجہ کا کہنا ہے کہ ہسپتال پرحملہ بین الاقوامی قوانین کی کھلی خلاف ورزی ہے۔
غیر ملکی خبر رساں ادارے کے مطابق یہ حملہ باغیوں کے مسلسل حملوں کی ایک کڑی ہے ،حملے میں مزید اموات کا خدشہ ہے، جاں بحق افراد میں خواتین بھی شامل ہیں اور ہسپتال کے عملے کے لوگ بھی حملے میں جاں بحق ہوئے۔