Type to search

خبریں قومی میڈیا

پیمرا کا جعلی خبر پر نیو ٹی وی کو 10 لاکھ روپے جرمانہ

پاکستان الیکٹرانک میڈیا ریگولیٹری اتھارٹی نے وزیراعظم کی تنخواہ میں اضافے کی جعلی خبر نشر کرنے پر نجی ٹی وی چینل ‘نیو ٹی وی’ پر 10 لاکھ روپے کا جرمانہ عائد کر دیا۔

اس سلسلے میں ہونے والی سماعت میں چینل انتظامیہ سے ایک ہفتہ قبل جاری کیے گئے اظہار وجوہ کے نوٹس پر جواب طلب کیا گیا تھا۔ مذکورہ معاملے پر ایک پیمرا عہدیدار نے بتایا کہ چینل پر وزیراعظم کی تنخواہ میں اضافے کی خبر نشر کرنے کا معاملہ ایک ٹاک شو کے دوران اٹھایا گیا تھا۔

ان کا مزید کہنا تھا کہ جب چینل کی جانب سے خبر کی تردید پر توجہ نہیں دی گئی تو جعلی خبر نشر کرنے پر اسے اظہار وجوہ کا نوٹس بھیجا گیا تھا۔ نوٹس میں لکھا گیا تھا کہ چینل نے 2015 کے ضابطہ اخلاق کی خلاف ورزی کی اور باضابطہ طور پر اس کی تردید بھی نہیں کی۔ تاہم ٹی وی چینل انتظامیہ نے سماعت میں دعویٰ کیا کہ اسی ٹاک شو کے دوران تردید نشر کر دی گئی تھی لیکن پیمرا نے اس دلیل کو اس بنیاد پر مسترد کر دیا کہ تردید، اظہار وجوہ کا نوٹس جاری ہونے کے بعد کی گئی تھی۔

واضح رہے کہ پیمرا کے زیادہ تر فیصلوں کا اختتام قانونی چارہ جوئی پر ہوتا ہے اور پیمرا کے خلاف دائر 500 مقدمات اس کی جانب سے دیے گئے فیصلوں اور جرمانے سے متعلق ہیں۔

اس حوالے سے ریگولیٹر کے ایک سینئر عہدیدار نے کہا کہ اس وقت پیمرا صرف ٹاک شوز اور خبرناموں کی نگرانی کر رہا ہے لیکن غلط ٹکرز بھی ضابطہ اخلاق کی خلاف ورزی اور جعلی خبروں کے زمرے میں آتے ہیں۔ تاہم ریگولیٹر ادارہ انسانی وسائل اور تکنیکی گنجائش کی کمی کے باعث ٹکرز کی نگرانی نہیں کرسکتا۔

عہدیدار کا مزید کہنا تھا کہ خدشہ ہے کہ اگر ٹکرز کی مانیٹرنگ کی گئی تو خلاف ورزی کے معاملات کئی گنا بڑھ سکتے ہیں۔

Tags:

You Might also Like

Leave a Comment

Your email address will not be published. Required fields are marked *