اسٹیبلشمنٹ کے لیے اس وقت سب سے بڑا چیلنج عمران خان ہیں اور نا ہی تحریک انصاف، بلکہ عدالتیں سب سے بڑا چیلنج ہیں۔ اسٹیبلشمنٹ عمران خان کو کچھ عرصہ جیل میں رکھ کر ملک میں سیاسی اور معاشی استحکام لانا چاہتی ہے مگر اس کو سپریم کورٹ کے ججز اور خصوصاً اسلام آباد ہائی کورٹ چیلنج کر رہی ہے۔ ملک میں ایمرجنسی یا مارشل لاء لگتا ہے تو عالمی قوتوں اور آئی ایم ایف کو زیادہ اعتراض نہیں ہو گا کیونکہ وہ پہلے ہی اپنے سارے معاملات پاک فوج کے ساتھ طے کر رہے ہیں۔ یہ کہنا ہے رضا رومی کا۔
تازہ ترین خبروں، تجزیوں اور رپورٹس کے لیے نیا دور کا وٹس ایپ چینل جائن کریں
نیا دور ٹی وی کے ٹاک شو 'خبرسےآگے' میں کورٹ رپورٹر مریم نواز خان نے بتایا لاپتہ شاعر احمد فرہاد کیس میں جسٹس محسن اختر کیانی نے ریمارکس دیے کہ کسی کی ایجنسیوں سے کوئی دشمنی نہیں ہے، ہم صرف یہ کہتے ہیں کہ قانون کے مطابق کام کریں۔ اداروں کے مابین لڑائی یا اختلاف کی باتیں بے بنیاد ہیں تاہم ملکی معاملات پر قومی سطح پر ڈائیلاگ ہونا چاہیے۔ مریم نواز خان نے بتایا کہ احمد فرہاد اگر آزاد کشمیر پولیس کی تحویل میں ہیں تو یہ علاقہ اسلام آباد ہائی کورٹ کے دائرہ اختیار سے باہر آتا ہے اور جسٹس کیانی اس پر مزید کوئی کارروائی نہیں کر سکتے۔
رضا رومی کے مطابق اسٹیبلشمنٹ کوئی بھی ہو ملک ریاض اس کے خلاف جا ہی نہیں سکتے۔ ملک ریاض عمران خان کیلئے نہیں بلکہ اپنے لئے ڈٹ کر کھڑے ہوئے ہیں۔ اگر وہ القادر ٹرسٹ میں گواہی دیتے ہیں تو وہ گواہی ان کے اپنے خلاف جائے گی۔ موجودہ اسٹیبلشمنٹ کے ساتھ ان کے اچھے تعلقات نہیں ہیں اور یہی وجہ ہے کہ یہ اسٹیبلشمنٹ ملک ریاض کو کوئی ڈھیل نہیں دے رہی۔
میزبان نادیہ نقی تھیں۔ 'خبرسےآگے' پیر سے ہفتہ ہر شب 9 بج کر 5 منٹ پر نیا دور ٹی وی سے پیش جاتا ہے۔