Type to search

Coronavirus خبریں صحت قومی

کرونا وائرس کے مریضوں میں اضافہ، وفاقی دارالحکومت کا علاقہ بارہ کہو مکمل سیل، پاک فوج تعینات

وفاقی دارالحکومت کے علاقے بارہ کہو کو کرونا مریضوں کی تعداد میں اضافے کے باعث مکمل سیل کرتے ہوئے شہریوں کی نقل و حرکت پر پابندی عائد کر دی گئی ہے جبکہ علاقے کی ذمہ داری پاک فوج کے سپرد کر دی گئی ہے۔

علاقے میں اعلانات کر کے شہریوں کو گھروں میں رہنے کے تلقین کی جا رہی ہے۔ صورتحال کو سنبھالنے کے لیے ضلعی انتظامیہ اسلام آباد، پولیس اور پاک فوج کی مشترکہ ٹیمیں تعینات کر دی گئی ہیں۔

واضح رہے کہ بارہ کہو کے علاقے کوٹ ہتھیال میں 6 افراد میں کرونا وائرس کی تصدیق ہوئی تھی جس پر کوٹ ہتھیال کی دو مساجد کو سیل کر کے کوٹ ہتھیال کو قرنطینہ میں تبدیل کر دیا گیا تھا۔ بعدازاں بارہ کہو میں مزید 7 کیس سامنے آنے پر مکمل علاقہ سیل کر دیا گیا ہے۔

بارہ کہو کے داخلی و خارجی راستوں پر پاک فوج، پولیس اور انتظامیہ کی ٹیمیں تعینات کر کے کسی بھی شہری کو اندر اور باہر آنے جانے سے روک دیا گیا ہے۔

اسلام آباد انتظامیہ کی جانب سے شہریوں کو راشن کی ترسیل یقینی بنانے کے لئے بھی اقدامات کئے جا رہے ہیں۔ دوکانداروں کے لئے انتظامیہ کی جانب سے جاری ایس او پیز کے تحت بارہ کہو کے اندر دوکانیں کھلی رہیں گی اور انتظامیہ کی نگرانی میں گاڑیوں میں راشن دوکانوں تک پہنچایا جائے گا جہاں سے شہری اپنے گھروں کے لئے راشن خرید سکیں گے۔

Tags:

Leave a Comment

Your email address will not be published. Required fields are marked *