Type to search

Coronavirus بین الاقوامی خبریں صحت

گرم موسم کرونا وائرس کے پھیلاؤ کی رفتار میں کمی لانے میں مدد دے سکتا ہے، نئی سائنسی تحقیق کے نتائج

  • 104
    Shares

گذشتہ ہفتے چین میں ایک تحقیق میں درجہ حرارت میں اضافے اور نئے نوول کرونا وائرس کے پھیلنے کی رفتار میں کمی کے بارے میں جائزہ لیا گیا تھا۔ اس تحقیق میں دعویٰ کیا گیا تھا کہ گرم اور مرطوب موسم اس نئے وائرس کی لوگوں کو بیمار کرنے کی صلاحیت کو متاثر کرسکتا ہے۔ اب یورپ اور امریکہ میں بھی گرم موسم اور وائرس کے پھیلنے کی رفتار کے درمیان تعلق کا جائزہ لیتے ہوئے کہا گیا ہے کہ گرم موسم قدرتی وبا کی رفتار میں کمی لانے میں مدد دے سکتا ہے۔

امریکہ کے میساچوسٹس انسٹیٹیوٹ آف ٹیکنالوجی کی ابتدائی تحقیق میں بتایا گیا کہ گرم علاقوں میں رہنے والی برادریوں میں بظاہر اس کرونا وائرس کے پھیلنے کی رفتار دیگر مقامات کے مقابلے میں نسبتاً سست ہے۔ محققین نے دریافت کیا کہ کرونا وائرس کے زیادہ پھیلاؤ والے علاقے وہ ہیں، جہاں درجہ حرارت کم تھا یعنی 3 سے 17 ڈگری سینٹی گریڈ۔ اگرچہ وہ ممالک جہاں اس وقت موسم گرما چل رہا ہے، وہاں بھی کرونا وائرس کے کیسز رپورٹ ہوئے ہیں، مگر 18 ڈگری سینٹی گریڈ سے زائد والے مقامات میں ان کی تعداد عالمی کیسز کے 6 فیصد سے بھی کم ہے۔

تحقیق میں شامل پروفیسر قاسم بخاری نے بتایا کہ جہاں درجہ حرارت کم ہوتا ہے وہاں کیسز کی تعداد میں تیزی سے اضافہ ہوتا ہے، آپ یہ رجحان یورپ میں دیکھ سکتے ہیں، حالانکہ وہاں کا طبی نظام دنیا میں بہترین ہے۔ ان کا کہنا تھا کہ درجہ حرارت کے عنصر کا عندیہ امریکہ میں بھی ملتا ہے جہاں جنوبی ریاستیں جیسے ایریزونا، فلوریڈا اور ٹیکساس میں واشنگٹن، نیویارک اور کولوراڈو کے مقابلے میں وائرس پھیلنے کی رفتار سست نظر آتی ہے۔ موسم کا یہ اثر اس سے ملتا جلتا ہے جس کا مشاہدہ وبائی امراض کے ماہرین دیگر وائرسز میں کرچکے ہیں۔

امریکہ میں گلوبل ایڈز کورڈینٹر اور نئے کرونا وائرس کے لیے قائم امریکی ٹاسک فورس کی رکن ڈاکٹر ڈیبورا بریکس نے ایک بریفنگ کے دوران بتایا کہ فلو کے دوران بھی عام طور پر نومبر سے اپریل کے دوران زیادہ کیسز سامنے آتے ہیں۔ انہوں نے یہ بھی کہا کہ یہ رجحان 2002 کے سارس کرونا وائرس کی وبا کے دوران بھی نظر آیا تھا، تاہم ان کا کہنا تھا کہ ابھی یہ تعین کرنا مشکل ہے کہ نئے کرونا وائرس کے حوالے سے بھی ایسا دیکھنے میں آئے گا یا نہیں۔

اس کے علاوہ بھی دیگر تحقیقی رپورٹس میں گرم موسم سے نئے کرونا وائرس کے پھیلنے کی رفتارر میں کمی کا بتایا گیا ہے۔ اسپین اور فن لینڈ کے سائنسدانوں نے ایک تحقیق میں دریافت کیا کہ خشک ماحول اور 2 سے 10 سینٹی گریڈ درجہ حرارت کے دوران یہ وائرس تیزی سے پھیلتا ہے۔ اسی طرح گزشتہ ہفتے چین میں ہونے والی تحقیق میں دریافت کیا گیا تھا کہ چینی حکومت کی جانب سے وبا کی روک تھام کے لیے جارحانہ اقدامات کرنے سے قبل ایسے شہر جہاں درجہ حرارت زیادہ اور ہوا میں زیادہ نمی تھی، وہاں وائرس کے پھیلنے کی شرح دیگر کے مقابلے میں سست تھی۔ مگر ان میں سے کسی بھی تحقیق کا جائزہ دیگر سائنسدانوں نے ابھی تک نہیں لیا اور امریکہ کے میساچوسٹس انسٹیٹیوٹ آف ٹیکنالوجی کے ماہرین نے تسلیم کیا ہے کہ عناصر جیسے سفری پابندیاں، سماجی فاصلے کے اقدامات، ٹیسٹوں کی دستیابی اور ہسپتالوں کا بوجھ ممکنہ طور پر مختلف ممالک میں کیسز کی تعداد پر اثرانداز ہوئے۔

ان کا کہنا تھا کہ موسم اور کرونا وائرس کے درمیان تعلق پالیسی سازوں اور عوام کے لیے اطمینان کا باعث نہیں ہونا چاہیے۔ ہمیں اب بھی ٹھوس احتیاطی تدابیر اختیار کرنے کی ضرورت ہے، گرم موسم ہوسکتا ہے کہ وائرس کو کچھ حد تک غیرفعال کر دے، مگر کم مؤثر پھیلاؤ کا مطلب اس کا خاتمہ نہیں ہوتا۔ انہوں نے مزید کہا کہ گرم موسم ہوسکتا ہے کہ ہوا یا سطح پر کرونا وائرس کی بقا کو طویل دورانیے کے لیے مشکل بنا دے مگر وہ پھر بھی گھنٹوں تک متعدی رہ سکتا ہے۔

درحقیقت سیزنل وائرسز جیسے انفلوائنزا اور موسمی زنزلہ زکام بھی گرمیوں کے دوران مکمل طور پر غائب نہیں ہوتے، بلکہ کسی نہ کسی حد تک لوگوں کے جسموں اور دنیا کے دیگر حصوں میں موجود رہتے ہیں، جہاں وہ دوبارہ پھیلنے کے لیے مناسب وقت کا انتظار کرتے ہیں۔ 

Tags:

You Might also Like

Leave a Comment

Your email address will not be published. Required fields are marked *