Type to search

تجزیہ حکومت سیاست کورونا وائرس

احتساب آپ کا بھی ہونا ہے!

پاکستان سمیت دنیا بھر میں کرونا نے ایک بھونچال بپا کیا ہے۔ سراسیمگی کی کیفیت ہے۔ ہر شخص آشفتہ حالی اور اضطراب سے گزر رہا ہے۔ لوگ محصور ہو کر رہ گئے ہیں زندگی کا پیہہ جام ہو چکا ہے، دنیا سکڑ کر منجمد ہو گئی ہے۔کوئی امید بر نہیں آتی کوئی صورت نظر نہیں آتی والی کیفیت ہے لیکن اس کے باوجود بھی، دنیا کے حوصلے بلند ہیں اور دنیا اس بحراں سے نمٹنے کے لیے دن رات کوشاں ہے۔ پاکستان جس کی آبادی کا ایک حصہ پہلے سے غربت کا سامنا کر رہا ہے اس وبا نے مزید زخموں کو ارزاں کر دیا پے۔پاکستان میں محض حکومت نے لفظی جمع خرچ کا بازار سجا لیاہے۔ وعدے وفا نہیں ہو رہے۔صرف دلاسوں سے کام لیا جا رہا ہے۔ان دلاسوں اور طفل تسلیوں نے لوگوں کو فاقوں پر مجبور کر دیا ہے۔حکومت یوقت صرف ہدایات پہ ہدایات دے رہی ہیں فاصلہ رکھیں بار بار ہاتھ دھوئیں۔ ہاں اس وبا سے بچنے کے لیے ایسی تدابیر ضروری ہیں لیکن تدابیر بھوک نہیں مٹا سکتیں۔ صرف تدابیر پہ اکتفا نہیں کیا جا سکتا ہے۔جتنے امدادی پیکجز کا اعلان کیا گیا ہے ان کی غریب عوام تک رسائی ممکن بنائی جاۓ۔ایک طرف ایسی صورت حال سے عوام گزر رہی ہے اور دوسری طرف سیاسی بحران بھی تھمنے کا نام نہیں لیتا۔

اس سے پہلے ٹائیگر فورس پر حکومت اور حزب اختلاف کی بے وجہ بحث جاری تھی اب ایک نئے سیاسی طوفان نے جنم لیا ہے حکومت کے اندر ہی رخنے پڑ گئے ہیں چینی اور گندم کی تحقیقاتی رپورٹ پبلک ہو ئی ہے۔اس پر شور مچا ہوا ہے۔ابھی فیصلہ باقی ہے یہ ابتدائی رپورٹ ہے۔وزیراعظم نے ذمہ داروں کے خلاف ایکشن لینے کا عندیہ دیا ہے۔ دولت بذریعہ سیاست کا کھیل تو برسوں سےجارہی ہے۔ اجارہ دار اور سرمایہ دار ہمیشہ حکومت کے اپنے مفادات کے ساتھ چپکے رہے ہیں لیکن پاکستان میں پہلی بار اس طرح کی رپورٹ شائع ہوئی جس نے اپنی حکومت کا احتساب کرنے کا عندیہ دیا ہے۔اب کی صورت حال میں یہ بات تو کھل کر سامنے آتی ہے کہ احتساب کے عمل سے کوئی نہیں بچ سکتا خواہ حکومت کے اپنے نمائندے کیوں نہ ہوں۔ساتھ ہی اس بات نے ابہام پیدا کیا ہے کیا احتسابی عمل کی ابتدا Reshuffling سے کی جا رہی ہے اگر تو اسے صائب تسلیم کیا جاۓ توکیا حکومت کا احتساب ایک عہدے سے ہٹا کر دوسرے عہدے دینا تک محدود ہے۔ بات اگر سبسڈی کی جاۓ تو یہ ایک حکومتی پالیسی ہے جس کے مطابق چینی ایکسپورٹ کرنے پر حکومت کی طرف سے تاجروں کو دی جاتی ہے اور سبسڈی اس صورت میں دی جاتی جب کوئی چیز مثلا چینی وافر مقدار میں موجود ہے جس سے اپنے ملک کی قلت بھی پوری ہوتی ہو۔تو اس صورت میں ایکسپورٹ ممکن ہے۔

خیر! فرانزک آڈٹ رپورٹ ابھی آنا باقی ہے اور یہ بھی دیکھنا باقی ہے احتساب کا عمل کتنا کارگر ثابت ہوتا ہے۔ مافیا زکاا حتساب ضرور ہونا چاہیےلیکن اس وقت جس سنگین حالات سے قوم نبرد آزما ہیں معاشرے کا غریب طبقہ زبوں حالی کا شکار ہے افلاس منڈلا رہا ہے مائیں بچوں کو تسلیاں دے رہی ہیں وہ حکومت کے امدادی پیکج کے منتظر ہیں ارباب اختیار سے گزارش ہے غریبوں کا خیال کریں یاد رکھیں احتساب ہو نا ہے۔

Tags:

Leave a Comment

Your email address will not be published. Required fields are marked *