حکومت کا یکم مارچ سے معمول کے مطابق نظام تعلیم بحال کرنے کا اعلان

وفاقی حکومت نے یکم مارچ سے نظام تعلیم مکمل بحال کرنے کا اعلان کر دیا ہے۔

وفاقی وزیر تعلیم شفقت محمود نے یکم مارچ سے اسکولوں میں پچاس فیصد پالیسی کا خاتمہ کرتے ہوئے معمول کے مطابق ہفتے میں پانچ روز کھولنے کا اعلان کیا۔

وزیر تعلیم شفقت محمود کا کہنا ہے کہ یکم مارچ سے ملک بھر کے تعلیمی ادارے ہفتے میں پانچ روز کھلیں گے، فیصلے کا اطلاق تمام تعلیمی اداروں پر ہوگا۔

شفقت محمود نے ٹوئٹر پر جاری پیغام میں اہم اعلان کرتے ہوئے کہا کہ ’یکم مارچ سے اسکول کے طلبہ کیلئے پانچوں دن کلاسز ہوں گی۔انہوں نے کہا کہ اسکولوں میں پچاس فیصد بچوں کیلئے ایک روز اور پچاس فیصد بچوں کی کلاسز اگلے روز  کرنے کی ہدایت صرف 28 فروری تک تھی۔

Important announcement. All schools will go back to regular 5 day classes from Monday March 1. Restrictions imposed in some major cities on schools to conduct staggered classes was only till Feb 28.

— Shafqat Mahmood (@Shafqat_Mahmood) February 25, 2021

خیال رہے کہ عالمی وبا کورونا وائرس کی دوسری لہر میں شدت کے بعد تعلیمی ادارے بند کردیے گئے تھے جنہیں 18 جنوری سے مرحلہ وار کھولا گیا۔

مرحلہ وار کھولے گئے اسکولوں میں پچاس فیصد بچے ایک روز اور پچاس فیصد بچوں کو اگلے روز آنے کا کہا گیا تھا۔