فیڈرل انوسٹی گیشن ایجنسی (ایف آئی اے) کے سائبر کرائم ونگ نے پیپلز پارٹی رہنما شرمیلا فاروقی کی والدہ کا تمسخر اڑانے کے معاملے میں اداکارہ نادیہ خان کو بری الذمہ قرار دیدیا ہے۔
اس سلسلے میں ایف آئی اے سائبر کرائم سندھ کے سربراہ عمران ریاض کی جانب سے سماجی رابطوں کی ویب سائٹ ٹویٹر پر جاری بیان میں کہا گیا ہے کہ شرمیلا فاروقی نے اداکارہ نادیہ خان کیخلاف ہتک عزت کا کیس دائر کیا تھا، تاہم اس میں انھیں بری الذمہ قرار دیدیا گیا ہے۔
عمران ریاض کا اپنی ویڈیو میں کہنا تھا کہ ہتک عزت کیس میں شرمیلا فاروقی نے دعویٰ کیا تھا کہ اداکارہ نادیہ خان نے ان کی والدہ کا تمسخر اڑایا اور ویڈیو بنا کر اسے سوشل میڈیا پر اپ لوڈ کر دیا۔
Host #nadiakhan has been cleared from defamatory charges levelled against her by MPA #sharmilafarooqi for defaming the mother of the Later. Making video and picture of someone and making it viral becomes crime only if the intention of making such video is to harass and disrepute pic.twitter.com/7MCMLEqPFE
— Imran Riaz (@ImmiRizz) March 14, 2022
ایف آئی اے سائبر کرائم ونگ کے سربراہ کا کہنا تھا کہ نادیہ خان کی جانب سے جو ویڈیو سوشل میڈیا پر اپ لوڈ کی گئی، اس کا دورانیہ چالیس منٹ کا تھا۔ میں نے اور میری ٹیم نے اس مواد کا تفصیلی جائزہ لیا اور اس نتیجے پر پہنچے کہ اس میں کوئی ایسی بات نہیں جس سے یہ تاثر ابھرے کے نادیہ خان نے شرمیلا فاروقی کی والدہ کا مذاق اڑایا تھا۔
انہوں نے کہا کہ جہاں تک چہرے کے تاثرات اور طنزیہ انداز اپنائے جانے کی بات ہے تو قانون میں اس حوالے سے کچھ درج نہیں ہے۔ اس لئے ایف آئی اے کی جانب سے نادیہ خان کو اس کیس میں بری الذمہ قرار دیا جاتا ہے۔
ادھر اداکارہ نادیہ خان نے ایف آئی اے سائبر کرائم ونگ سندھ کے سربراہ عمران ریاض کی ویڈیو کو اپنے انسٹاگرام اکائونٹ پر شیئر کرکے خدا کا شکر ادا کیا کہ وہ بالاخر ہتل عزت کے کیس میں سرخرو ہوئیں۔
