نیویارک: امریکی عدالت نے 28 سالہ خاتون کو غریب کسان کی بیٹی ہوکر ارب پتی سماجی رہنما بننے کا ڈرامہ رچانے پر مجرم قرار دیتے ہوئے انہیں سزاوار قرار دیا ہے۔
ارب پتی سماجی رہنما بننے کا ڈرامہ رچانے والی خاتون کے وکیل کے مطابق ان کی مؤکل کو آئندہ ماہ 9 مئی کو سزا سنائی جائے گی جبکہ انہیں پانچ سے پندرہ سال تک سزا سنائی جائے گی۔
اینا سورکن کے خلاف دلائل دینے والے وکیل کے مطابق ارب پتی سماجی رہنما بن کر ڈرامہ رچانے والی خاتون کے فراڈ کا پتہ اس وقت چلا جب انہوں نے مختلف بینکس سے لیے گئے کریڈٹ کارڈز کی ادائیگی نہیں کی۔
رپورٹ کے مطابق اینا سورکن کا اصل نام اینا ڈیلوے تھا اور ان کا تعلق جرمنی سے تھا، تاہم وہ گزشتہ کچھ عرصے سے نیویارک میں ارب پتی سماجی رہنما بن کر عالمی سطح پر توجہ حاصل کرنے سمیت مختلف اداروں سے فنڈ بٹورنا چاہتی تھیں۔
دلچسپ بات یہ ہے کہ ایک غریب کسان کی بیٹی نے ارب پتی سماجی رہنما بننے کی منصوبہ بندی کرتے ہوئے نیویارک میں کرائے پر ایک نجی ہیلی کاپٹر کی خدمات بھی حاصل کر رکھی تھیں جب کہ وہ انتہائی پرتعیش ہوٹلز میں رہتی تھیں۔
اینا سورکن کے خلاف دلائل دینے والے وکیل نے عدالت کو بتایا کہ ارب پتی سماجی رہنما کا ڈرامہ کرنے والی خاتون کو ایک بینک نے ایک لاکھ ڈالر کا قرض دیا، بینک کو انہوں نے بتایا تھا کہ وہ ایک عالمی سطح کا نجی آرٹس کلب تعمیر کرنا چاہتی ہیں تاہم وہ قرض کو واپس کرنے میں مکمل طور پر ناکام رہیں۔
رپورٹ کے مطابق اینا سورکن کے والد جرمنی میں معمولی کسان ہیں اور وہ اپنے کھیتوں میں ہونے والی فصل کو فروخت کر کے گزارا کرتے ہیں تاہم اینا سورکن نے نیویارک میں لوگوں کو بتایا تھا کہ ان کے والد کسی آئل کمپنی کے بڑے عہدیدار ہیں اور وہ خود نئے کاروبار شروع کرنے کا ارادہ رکھتی ہیں۔
ان کے خلاف عینی شاہد کے طور پر پیش ہونے والی ایک خاتون فوٹوگرافر کے مطابق اینا سورکن نے انہیں ایک پرتعیش ہوٹل میں مدعو کیا جہاں ایک رات کے قیام کا کرایہ 7 ہزار ڈالر تھا اور وہ وہاں تین دن تک ٹھہریں۔
عینی شاہد خاتون کا کہنا تھا کہ جب اینا سورکن نے بل کی ادائیگی کرنا چاہی تو ان کا کریڈٹ کارڈ نہیں چلا جس کے بعد انہیں تمام بل ادا کرنا پڑا اور اس واقعے کے بعد ان کے مالی مسائل بڑھ گئے۔ اینا سورکن کے خلاف ہوٹلز کی جانب سے مقدمات دائر کرنے کے بعد پولیس نے انہیں گرفتار کیا، جس کے بعد ان کے خلاف مزید شکایات سامنے آئیں۔
بعد ازاں اینا سورکن کے خلاف ٹرائل شروع کیا گیا، جس کی متعدد سماعتیں ہوئیں اور 25 اپریل کو ہونے والی سماعت کے دوران عدالت نے انہیں مجرم قرار دیتے ہوئے فیصلہ دیا کہ انہیں 9 مئی کو سزا سنائی جائے گی۔
