اینکر پرسن ارشد شریف کا کہنا تھا کہ مولانا فضل الرحمان نے 27 اکتوبر کی تاریخ بہت سوچ سمجھ کر رکھی ہے، اس دن بھارت نے کشمیر پر قبضہ کیا تھا اگر اس روز حکومت کی جانب سے کوئی ردعمل دیا گیا یا مولانا فضل الرحمان کی ریلی پر کریک ڈاؤن کیا تو پوری دنیا میں اس کا تاثر اچھا نہیں جائے گا۔
مولانا فضل الرحمان نے آزادی مارچ کی تاریخ 27 اکتوبر کیوں رکھی؟ جانئے ارشد شریف سے@arsched pic.twitter.com/h1eUx4I472
— ASKardar (@ASKardar) October 3, 2019
دوسری جانب وزیر خارجہ شاہ محمود قریشی نے نجی ٹی وی سے گفتگو کرتے ہوئے کہا کہ 27 اکتوبر کو مولانا نے مارچ کا اعلان کیا ہے اور 27 اکتوبر کو ہی بھارت نے مقبوضہ کشمیر پر قبضہ کیا تھا اور یہ دن کشمیریوں سے منسوب ہے۔ اس روز دھرنے سے پاکستان اور کشمیر کے کاز کو نقصان پہنچے گا لہذا مولانا 27 تاریخ پر نظرثانی کریں۔
شاہ محمود قریشی کا کہنا تھا کہ مولانا فضل الرحمان قابل احترام ہیں اور 27 اکتوبر کو کشمیر کےعلاوہ کوئی بات ہوتی ہے تو بھارت اسے بڑھا چڑھا کر پیش کرے گا۔ یہ وہ دن ہے جس دن بھارت نے کشمیر پر قبضہ کیا تھا۔ مولانا فضل الرحمان احتجاج کریں لیکن اسے کشمیر کے ساتھ نتھی نہ کریں۔
خیال رہے کہ جمعیت علمائے اسلام (ف) کے سربراہ مولانا فضل الرحمان نے گزشتہ روز حکومت کے خلاف 27 اکتوبر کو آزادی مارچ شروع کرنے کا اعلان کیا تھا۔
