سیلفی کا شوق یوں تو بہت عام ہے لیکن اس کا ایک دلچسپ مظاہرہ جمعرات کو اقوامِ متحدہ کی جنرل اسمبلی کے اجلاس میں اُس وقت دیکھنے میں آیا جب ایل سلواڈور کے صدر نجیب بکلے اپنی تقریر کے لیے روسٹرم پر آئے۔
نجیب بکلے جنرل اسمبلی اجلاس میں اپنی پہلی تقریر سے قبل سیلفی لینا نہ بھولے۔ وہ خاصے غیر روایتی انداز میں دکھائی دیے۔ اڑتیس سالہ نجیب بکلے نے تقریر سے قبل اجلاس میں شریک رہنماؤں کا شکریہ ادا کیا اور پھر خصوصی طور پر اپنی اہلیہ اور بیٹی کا بھی شکریہ ادا کیا۔
نجیب بکلے نے اس موقع پر کہا کہ اگر آپ مجھے صرف ایک سیکنڈ کا وقت دیں تو۔ یہ کہتے ہوئے انہوں نے اپنا آئی فون 11 نکالا اور اپنی تصویر کھینچی۔ یہ تصویر انہوں نے بعد میں اپنے ٹوئٹر اکاؤنٹ پر بھی پوسٹ کی۔
#UNSelfie pic.twitter.com/P7qH5p2l04
— Nayib Bukele 🇸🇻 (@nayibbukele) September 26, 2019
سیلفی لینے کے بعد انہوں نے کہا کہ یقین کریں جب میں یہ تصویر شیئر کروں گا تو اسے بہت لوگ دیکھیں گے اور پھر میری تقریر بھی سنیں گے۔ اُن کا کہنا تھا کہ انہیں یقین ہے کہ انہوں نے اچھی تصویر لی ہوگی۔
نجیب بکلے کا مزید کہنا تھا کہ کچھ تصویریں انسٹاگرام پر ڈال دینے کا اثر اقوامِ متحدہ کی جنرل اسمبلی میں کی گئی تقریر سے زیادہ ہو سکتا ہے۔ انہوں نے تجویز دی کہ عالمی رہنماؤں کا سالانہ اجلاس ویڈیو کانفرنس کے ذریعے بھی تو ہو سکتا ہے۔
El discurso millennial del presidente @nayibbukele sorprende en la Asamblea de las Naciones Unidas. #ElSalvador pic.twitter.com/tYv8DazM98
— NB (@notibomba) September 26, 2019
نائب بوکیلی جون 2019 میں اپنے ملک کے صدر منتخب ہونے سے قبل سان سلواڈور شہر کے میئر تھے اور وہ سوشل میڈیا کے استعمال کے حوالے سے بہت زیادہ مشہور ہیں۔
ایل سلواڈور کے صدر نے اپنی صدارتی مہم میں فیس بک لائیو کا سب سے زیادہ استعمال کیا اور ان کی کامیابی کو بھی سوشل میڈیا کے زبردست اور مفید ہونے کا نتیجہ قرار دیا گیا۔ اپنے سوشل میڈیا کے لمحات کے لیے ہی صدر بوکیلی کی بیوی گبریلا نے اپنی شیر خوار بچی کو بھی اقوام متحدہ میں والد کی تقریر سننے کے لیے لایا تھا۔
