سابق صدر آصف علی زردای کو نیب ترمیمی آرڈیننس کے تحت ایک دن میں دوسرا ریلیف مل گیا ہے۔ ان کے خلاف مشکوک ٹرانزیکشن کا ریفرنس بھی نیب کو واپس بھیج دیا گیا ہے۔
احتساب عدالت کے جج محمد بشیر نے دلائل سننے کے بعد فیصلہ سنایا جس میں کہا گیا کہ احتساب عدالت کا ریفرنس متعلقہ فورم کو واپس بھجوایا جائے۔ احتساب عدالت نے ٹیکس معاملات پر نیب کا اختیار ختم ہونے پر ریفرنس واپس بھجوانے کا فیصلہ سنایا ہے۔
یاد رہے کہ قومی احتساب بیورو نے گزشتہ سال آصف زرداری کے خلاف 8 ارب روپے کی مشکوک ٹرانزیکشن کا ریفرنس دائر کیا تھا جس میں الزام لگایا گیا تھا کہ اس ٹرانزیکشن سے آصف زرداری کے کلفٹن والے گھر کی خریداری کے لیے ادائیگی کی گئی تھی۔ نیب نے مذکورہ ریفرنس میں آصف زرداری پر ٹیکس چوری سے متعلق الزامات بھی عائد کیے تھے۔
یہ بھی یاد رہے کہ اپریل میں تحریک عدم اعتماد کی کامیابی کے بعد تحریک انصاف کی حکومت جانے کے بعد پی ڈی ایم نیب قوانین میں ترامیم کی ہیں جن کے ذریعے پی ڈی ایم کے رہنماؤں کو کرپشن کے کیسز میں عدالتوں سے ریلیف ملنے کا سلسلہ جاری ہے۔ اس سے قبل شہباز شریف، سلیمان شہباز، مریم نواز، فریال تالپور اور اسحاق ڈار کو بھی عدالتوں سے بڑے ریلیف مل چکے ہیں۔
