سوشل میڈیا پر اسامہ بن لادن کی باقیات ملنے کی خبریں سامنے آ رہی ہیں اور ایک تصویر وائرل ہو رہی ہے جس میں دعویٰ کیا جا رہا ہے کہ یہ تصویر اسامہ بن لادن کی باقیات کی ہے۔
بین الاقوامی میڈیا کے مطابق ان دعوؤں میں کوئی حقیقت نہیں، القاعدہ کے سربراہ اسامہ بن لادن کی ہلاکت کے بعد سے اب تک ان کی لاش سامنے نہیں آئی جب کہ اس حوالے سے بہت سی قیاس آرائیاں ہوتی رہی ہیں۔
انٹرنیٹ پر سامنے آنے والی تصویر ایک سی پی (سی شیل) کی ہے جو ایک برطانوی جوڑے کے ہاتھ لگی ہے۔
برطانیہ میں 60 سالہ خاتون ڈیبرا اولیور اپنے 62 سالہ شوہر کے ساتھ 42 ویں شادی کی سالگرہ منانے کے لیے ساحل سمندر ونچلیسا میں موجود تھیں جہاں انہیں پانی سے ایک چھوٹی سی پی ملی، جسے وہ دیکھ کر حیران رہ گئیں۔ ڈیبرا کا کہنا ہے کہ جب انہوں نے پہلی مرتبہ سی پی کو پانی میں جاتے دیکھا تو وہ تذبذب کا شکار ہوگئیں اور انہیں خیال ہوا کہ یہ کسی کی شکل سے ملتا ہے جس کے لیے انہوں نے سمندر میں تیرنا شروع کیا اور اسے پکڑنے کے لیے بھرپور کوشش کی۔
ڈیبرا نے بتایا کہ آخر میں بہت کوششوں کے بعد جب میں نے شکل والی سی پی کو حاصل کرلیا تو اسے دیکھ کر میں بالکل چونک گئی تھی، میں نے اسے اپنے ہاتھ میں اٹھایا تو غور کیا کہ ایک پگڑی ہے، تاہم زیادہ غور کرنے پر سمجھ آیا کہ اس پر بنی شبیہ اسامہ بن لادن سے مماثلت رکھتی ہے۔
خیال رہے کہ 8 سال قبل امریکہ نے اسامہ بن لادن کی لاش کو سمندر برد کر دیا تھا۔
