رحیم یار خان میں لیاقت پور کے قریب گیس سلنڈر پھٹنے سے تیز گام ایکسپریس کی بوگیوں میں آگ لگ گئی، جس کے نتیجے میں 66 افراد کے جاں بحق ہونے کی تصدیق ہوگئی ہے جبکہ حادثے میں متعدد افراد زخمی بھی ہوئے ہیں، جن میں سے بیشتر کی حالت تشویشناک ہے۔
تفصیلات کے مطابق بدقسمت ٹرین کو حادثہ صبح 6:15 منٹ پر پنجاب کے ضلع رحیم یار خان کی تحصیل لیاقت پور کے چنی گوٹھ کے نزدیک چک نمبر 6 کے تانوری سٹیشن پر پیش آیا۔ تیز گام ٹرین کی ایئر کنڈیشنڈ اور بزنس کلاس کی تین بوگیوں میں آتشزدگی ہوئی جن میں 209 مسافر سوار تھے۔
رحیم یار خان؛کراچی سے لاہورجانیوالی تیزگام ایکسپریس کی تین بوگیومیں آگ بھڑک اٹھی67 افراد جان بحق کئی جھلس گئے۔#NayaDaur #TezgamExpress #RahimYarKhan pic.twitter.com/Tdj9Usdvkj
— NayaDaur Urdu (@nayadaurpk_urdu) October 31, 2019
رحیم یار خان کے ڈسٹرک پولیس افسر نے ٹرین حادثے میں 66 افراد کی ہلاکت کی تصدیق کرتے ہوئے بتایا کہ جاں بحق افراد میں سے کسی کی بھی اب تک شناخت نہیں ہوسکی۔
ڈی پی او نے بتایا کہ حادثے میں جاں بحق و زخمی ہونے والوں کو ٹی ایچ کیو لیاقت پور اور بہاول پور کے ہسپتالوں میں منتقل کر دیا گیا ہے جب کہ آگ پر بھی قابو پالیا گیا ہے۔
ریسکیو اہلکاروں کے مطابق آگ کی شدت بہت زیادہ تھی جس نے تیزی سے دوسری بوگیوں کو بھی اپنی لپیٹ میں لے لیا، جس کے باعث ہلاکتوں میں مزید اضافے کا خدشہ ہے۔ ریسکیو ذرائع کے مطابق مبینہ طور پر تبلیغی جماعت کے مسافروں کا گیس سلنڈر پھٹنے سے آگ لگی۔ حادثے کا شکار اکانومی کلاس کی دو بوگیاں امیرحسین اینڈ جماعت کے نام سے بک کی گئی تھیں۔
حکام کے مطابق مسافر ٹرین میں آگ لگنے کے افسوسناک حادثے کے بعد ضلع بھر کے ہسپتالوں میں ایمرجنسی نافذ کر دی گئی ہے۔
حادثے کے سبب دیگر ٹرینوں کو ان کے قریبی اسٹیشنز پر ہی روک دیا گیا جبکہ اسی ٹریک پر آنے والی زکریا ایکسپریس کو لیاقت پور سے قبل خان پور اسٹیشن پر روکا گیا۔
پاک فوج کے شعبہ تعلقات آئی ایس پی آر کی جانب سے جاری بیان کے مطابق جائے حادثہ پر ریسکیو اور ریلیف فراہم کرنے کے لیے سول انتظامیہ کی معاونت کے لیے پاک فوج کے دستے، ڈاکٹرز اور طبی عملے کو روانہ کیا گیا۔ آئی ایس پی آر نے بتایا کہ شدید زخمیوں کو منتقل کرنے کے لیے ملتان سے آرمی ایوی ایشن کا ہیلی کاپٹر بھی روانہ کیا گیا ہے۔
وفاقی وزیر ریلوے شیخ رشید نے جاں بحق افراد کی تصدیق کرتے ہوئے کہا کہ تیزگام ایکسپریس کو حادثہ کراچی سے راولپنڈی جاتے ہوئے پیش آیا۔ تاہم ریسکیو اور فائر بریگیڈ کی امدادی کارروائیاں جاری ہیں۔ انہوں نے بتایا کہ آگ ٹرین کی اکانومی کلاس میں گیس سلنڈر پھٹنے سے لگی جب کہ مسافروں نے ٹرین سے کود کر جانیں بچائیں۔
وزیر ریلوے شیخ رشید نے سانحہ تیز گام میں 64افراد کے جاں بحق ہونے کی تصدیق کردی
تیز گام میں آگ لگنے سے 33افراد زخمی
ہوئے ہیں ،شیخ رشیدتبلیغی جماعت کےارکان کےناشتہ بنانےکےدوران سلنڈرپھٹنےسےآگ لگی،شیخ رشید#NayaDaur #TezgamExpress #RahimYarKhan @ShkhRasheed
— NayaDaur Urdu (@nayadaurpk_urdu) October 31, 2019
دوسری جانب ریلوے حکام کے مطابق ٹرین میں سلنڈر لے جانے کی قطعاً اجازت نہیں ہے اور تحقیقات کے بعد اس بات کا تعین کیا جائے گا کہ کس کی غفلت کے باعث مسافر ٹرین میں سلنڈر لے کر سوار ہوئے۔
چیئرمین ریلوے سکندر سلطان کے مطابق گریڈ 21 کے وفاقی انسپکٹر دوست علی لغاری کو تحقیقاتی آفیسر مقرر کردیا گیا ہے جو جائے حادثہ پر تمام شواہد اکھٹے کر کے وزیراعظم کو رپورٹ پیش کریں گے۔ چیئرمین ریلوے سکندر سلطان نے بتایا کہ تحقیقات کے لیے دیگر افسران کو بھی جائے حادثہ پر روانہ کردیا گیا ہے۔
وزیراعظم عمران خان، صدرمملکت عارف علوی سمیت حکومتی و دیگر سیاسی شخصیات نے حادثے میں قیمتی جانوں کے نقصان پر گہرے دکھ اور غم کا اظہار کیا ہے۔ وزیراعظم عمران خان نے متعلقہ حکام کو ہدایت کی کہ زخمیوں کو علاج معالجے کی بہترین سہولیات فراہم کی جائیں۔
