کراچی ڈی ایچ اے کینٹونمنٹ بورڈ کے رہائشی جنہوں نے دو روز قبل ڈی ایچ اے انتظامیہ کے خلاف بارشی پانی کے ناقص نکاس اور بد ترین انتظامی معاملات پر احتجاج کیا تھا انہیں اب نامعلوم افراد کی جانب سے دھمکی آمیز کالز موصول ہو رہی ہیں۔
یہ کالز ان افراد کو موصول ہو رہی ہیں جنہوں نے اس احتجاج کو منعقد کروایا تھا۔ ان منتظمین میں سے ایک نے نیا دور کو بتایا کہ انہیں ان کالز میں کہا گیا ہے کہ اب کوئی نیا احتجاج نہ ہو۔ حتیٰ کہ ان کالز کے بعد مظاہرین کی تعداد بھی احتجاج میں سے کم ہو ئی ہے۔ انہوں نے بتایا کہ اس سب کے بعد مظاہرین میں ایک خوف و ہراس کی فضا پائی جاتی ہے۔
یاد رہے کہ ڈی ایچ اے میں حالیہ بارشوں کے بعد پانی گھروں کے اندر داخل ہوگیا تھا اور کئی دنوں سے اس پانی کو نکالا نہیں جا سکا۔
ڈی ایچ اے پاک فوج کے زیر انتظام ہے اور ملک میں بہترین رہائشی منصوبہ ہونے کا دعویدار بھی ہے۔ نیا دور نے موقف جاننے کےلئے ڈی ایچ اے کراچی سے رابطہ کرنے کی کوشش کی تاہم رابطہ نہیں ہوسکا۔
