اسراء یونیورسٹی کے وائس چانسلر ڈاکٹر عبداللہ قاضی لاپتا ہو گئے ہیں۔ گزشتہ روز دوپہر ساڑھے تین بجے سے ان کا موبائل فون بھی بند ہے۔ جامعہ کی انتظامیہ نے ان کی گمشدگی پر پریشانی کا اظہار کیا ہے۔
اسراء یونیورسٹی کی جانب سے جاری اعلامیہ میں کہا گیا ہے کہ وائس چانسلر ڈاکٹر عبداللہ قاضی کی گمشدگی پریشان کن ہے۔ ہم ان کی صحت اور خیریت کے بارے میں فکرمند ہیں۔
یونیورسٹی انتظامیہ نے کہا ہے کہ اگر کسی کو بھی ڈاکٹر عبداللہ قاضی کے بارے میں کوئی بھی معلومات ہیں تو ہمیں ان کے بارے میں اطلاعات فراہم کی جائیں تاکہ ان کی بحفاظت واپسی یقینی بنائی جا سکے۔
The Vice-Chancellor of the Isra University is missing since November 2. Another statement issued by the varsities reads that he along with his family was picked by around 50 armed guards and shifted to an unidentified place pic.twitter.com/ZvEb0Qt1x7
— Arshad Yousafzai (@Arshadyousafzay) November 3, 2021
اس سے قبل گزشتہ روز یونیورسٹی انتظامیہ کی جانب سے آئی جی سندھ سمیت پولیس کے اعلیٰ افسران کو ایک خط میں ڈاکٹر عبداللہ قاضی کی بازیابی کیلئے خط بھی لکھا گیا تھا۔
خط میں کہا گیا تھا کہ وائس چانسلر، ان کے بیٹے پروفیسر عبدالسبحان قاضی اور ان کی اہلیہ سمیرا قاضی یونیورسٹی کے امور سرانجام دینے کے بعد اپنے گھر گئے تو وہاں 50 سے زائد مسلح افراد کو کھڑا پایا۔
انتظامیہ نے کہا کہ ڈاکٹر عبداللہ قاضی کو وہاں موجود افراد ولی اللہ قاضی کی ہدایات پر نامعلوم مقام پر لے گئے۔ خاندان کے افراد نے جب ان سے رابطہ کرنے کی کوشش کی تو ان کا موبائل بند ملا۔
خط میں پولیس حکام سے استدعا کی گئی ہے کہ وہ فوری طور پر ڈاکٹر عبداللہ قاضی کو بازیاب کرائیں کیونکہ ان کی صحت کے بارے میں شدید خدشات لاحق ہیں۔
