مسلم لیگ ن کے صدر شہباز شریف کورونا وائرس میں مبتلا ہو گئے ہیں۔ انہوں نے ٹیسٹ مثبت آنے کے بعد خود کو گھر میں آئسولیٹ کر لیا ہے۔
اس بات کی اطلاع مسلم لیگ ن کی ترجمان مریم اورنگزیب نے میڈیا کو دی۔ انہوں نے بتایا کہ شہباز شریف کا کورونا وائرس کا ٹیسٹ پازیٹو آیا ہے، جس کے بعد انہوں نے خود کو گھر پر آئسولیٹ کر لیا ہے۔
شہباز شریف نے کورونا وائرس کی علامتیں ظاہر ہونے پر گذشتہ روز اپنا ٹیسٹ کرایا تھا۔ لیگی رہنما کی جانب سے عوام سے جلد صحت یابی کیلئے دعاؤں کی اپیل بھی کی گئی ہے۔
میاں شہباز شریف کا کورونا ٹیسٹ مثبت آیا ہے.
قوم سے دعاؤں کی درخواست ہے.
شہباز شریف نے اپنی رہائشگاہ پر اپنے آپ کو قرنطینہ کر لیا ہے اور ڈاکٹروں کی ہدایات پر عمل کر رہے ہیں. علامات ظاہر ہونے پر ٹیسٹ کرایا گیا۔ ڈاکٹروں نے مکمل آرام کا مشورہ دیا ہے— Attaullah Tarar (@TararAttaullah) January 19, 2022
دوسری جانب مسلم لیگ ن کے رہنما عطا تارڑ نے کہا ہے کہ ڈاکٹروں نے شہباز شریف کو مکمل آرام کا مشورہ دیتے ہوئے ضروری ہدایات پر عمل کرنے کا کہا ہے۔
یہ بات ذہن میں رہے کہ شہباز شریف دوسری بار کورونا وائرس کا شکار ہوئے ہیں۔ اس سے قبل وہ جون 2020ء میں کووڈ 19 میں مبتلا ہوئے تھے۔
شہباز شریف نے مارچ 2021ء میں کورونا وائرس سے بچاؤ کی ویکسین لگوائی تھی۔ انہیں کوٹ لکھپت جیل میں جناح ہسپتال کے ایم ایس کی نگرانی میں ویکسین لگائی گئی تھی۔
