آپ نے اکثر دیکھا ہوگا کہ بجلی کے پلگ (Plug) میں دو پنیں یا ٹانگیں ہوتی ہیں اور اس کی وجہ انتہائی سادہ ہے یعنی گرم (کرنٹ) تار اور ٹھنڈی (نیوٹرل) تار۔ جب پلگ لگایا جاتا ہے تو گرم تار اور ٹھنڈی تار کی وجہ سے سرکٹ مکمل ہوتا ہے اور چیز بجلی کی وجہ سے چلنے لگتی ہے لیکن اگر ان میں سے ایک بھی تار نکل جائے تو سرکٹ بریک ہو جاتا ہے اور مذکورہ چیز بھی آف ہوجاتی ہے۔
یہاں تک تو بات سمجھ آتی ہے لیکن کچھ پلگ ایسے بھی ہوتے ہیں جن میں تین ٹانگیں ہوتی ہیں۔ آخر یہ تیسری تار یا ٹانگ کس مقصد کے لئے لگائی جاتی ہے تو اس کا جواب بھی انتہائی آسان ہے۔
اگر دو تاروں کی موجودگی میں ہمیں بجلی کا جھٹکا لگے تو سرکٹ مکمل ہونے کی وجہ سے یہ جھٹکا اس قدر شدید ہوتا ہے کہ ہماری جان بھی جا سکتی ہے اور اسی طرح اگر مین تار سے آنے والی بجلی کی تاروں کی سپلائی میں کسی بھی وجہ سے بہت زیادہ بجلی آجائے گھر میں موجود تمام اشیا جل بھی سکتی ہیں اور گھر کو آگ لگنے کا خطرہ بھی ہوسکتا ہے۔
لہذا اس خطرے کو دور کرنے کے لئے ایک ارتھ کی تار بھی رکھی جاتی ہے جو کہ زمین کے اندر جاتی ہے۔ کرنٹ زیادہ آنے کی صورت میں یہ تار اپنا کام کرتی ہے اور زائد بجلی کو زمین میں لے جا کر گھر اور اشیا کو جلنے سے بچاتی ہے۔
اگر ہمیں کرنٹ بھی لگ جائے تو یہ تار اپنا کام کرتے ہوئے جھٹکے کے اثر کو زائل کرتی ہے اور انسان کی زندگی محفوظ رہتی ہے۔
