پاکستان کے سٹار کرکٹر رومان رئیس گذشتہ چند دنوں سے کرونا وبا کے دوران لاک ڈاؤن کے متاثرین میں راشن کی تقسیم کا کام کر رہے ہیں۔ اس کام کیلئے فنڈز اکٹھا کرنے کی غرض سے انہوں نے اپنا کرکٹ کا سامان نیلام کرنے کا اعلان کیا تھا۔
رومان رئیس نے چیمپئنز ٹرافی میں ڈیبیو پر پہنی گئی کیپ، پاکستان اور اسلام آباد یونائیٹڈ کی شرٹ اور کرکٹ بیٹ نیلام کیا۔ نیلامی کا عمل 16 سے 19 اپریل تک جاری رہا۔
رومان رئیس کی چیمپئنز ٹرافی کیپ کی سب سے زیادہ بولی 1 لاکھ 60 ہزار لگی۔ اُن کا بیٹ 80 ہزار روپے جبکہ اسلام آباد یونائیٹڈ کی شرٹ 60 ہزار روپے میں نیلام ہوئی۔
کرکٹ گئیرز کی نیلامی سے رومان کے پاس 9 لاکھ روپے سے زائد فنڈ اکٹھا ہوا جس سے متاثرین کو راشن اور رمضان المبارک کے دوران سحری اور افطاری فراہم کی جائے گی۔