بین الاقوامی تعلقات سفاک ہوتے ہیں۔ ایک دن آپ سب کی آنکھ کا تارا ہیں، اگلے ہی دن دنیا آپ پر تھو تھو کر رہی ہے۔ کچھ ایسی ہی صورتحال سعودی ولی عہد محمد بن سلمان کے ساتھ بھی ہے جن کے خلاف امریکی انٹیلیجنس کی خفیہ رپورٹ بالآخر بائیڈن انتظامیہ نے عوام کو جاری کر دی ہے۔
جون 2017 میں جب انہیں سعودی عرب کا ولی عہد بنایا گیا، یعنی یہ طے کر دیا گیا کہ موجودہ بادشاہ یعنی شاہ سلمان کے بعد محمد بن سلمان سعودی عرب کے بادشاہ بنیں گے تو یہ کوئی اچنبھے کی بات نہ تھی۔ محمد بن سلمان کے بارے میں پہلے ہی واضح تھا کہ یہ شاہ سلمان کے چہیتے ہیں اور گذشتہ دو سالوں سے سلطنت میں ان کا عمل دخل بڑھتا جا رہا تھا۔ 2016 کے امریکی انتخابات میں ڈانلڈ ٹرمپ فاتح ٹھہرے اور اس کے کچھ ہی عرصے بعد سعودی عرب میں شاہ سلمان نے محمد بن سلمان کو اپنا جانشین مقرر کر دیا۔