لاہور کی سیشن عدالت نے پلاٹ پر قبضے کے معاملے میں صوبائی وزیر میاں محمود الرشید سمیت دیگر کے خلاف قانون کے مطابق کارروائی کرتے ہوئے مقدمہ درج کرنے کا حکم دے دیا۔
ایڈیشنل سیشن جج نے صوبائی وزیر اور دیگر کے خلاف شہری کی درخواست پر حکم جاری کیا۔
درخواست گزار عابد انصار کی جانب سے دائر درخواست میں مؤقف اختیار کیا گیا تھا کہ محمود الرشید سمیت 9 افراد نے مصطفیٰ ٹاؤن میں اس کے ایک کنال کے پلاٹ پر قبضے کی کوشش کی اور اسے جان سے مارنےکی دھمکیاں دیں۔
درخواست گزار نے استدعا کی کہ عدالت محمود الرشید سمیت دیگر کے خلاف مقدمہ درج کرنے کا حکم دے۔
عدالت نے ایس ایچ او مصطفیٰ ٹاؤن لاہور کو درخواست گزار عابد انصار کا بیان ریکارڈ کرنے کا حکم دیا اور اپنے فیصلے میں کہا کہ اگر ایس ایچ او سمجھے کہ قابل دست اندازی جرم ہے تو محمود الرشید سمیت دیگر کے خلاف مقدمہ بھی درج کیا جائے۔
عدالت نےحکم دیا کہ تفتیشی افسر تحقیقات میں الزامات درست ثابت ہونے پر ملزموں کو گرفتار بھی کرے۔
![پلاٹ پر قبضہ: عدالت کا صوبائی وزیر محمود الرشید کے خلاف مقدمہ درج کرنے کا حکم](https://urdu.nayadaur.tv/digital_images/large/2021-11-03/news-1688380072-9966.jpg)