نجی ٹی وی چینل کے رپورٹر انعام اللہ خٹک نے سماجی رابطوں کی ویب سائٹ ٹویٹر پر ٹویٹ کرتے ہوئے انکشاف کیا کہ آرمی ایکٹ ترامیمی بلز 2020 کی اسمبلی کارروائی کے دوران پارلیمنٹ ہاؤس کی کیبل منقطع کر دی گئی۔
انہوں نے اپنی ٹویٹ میں لکھا کہ اجلاس شروع ہونے سے قبل وزیراعظم قومی اسمبلی پہنچ گئے۔ آج آرمی ایکٹ میں ترامیم ہوں گی۔ پارلیمنٹ کا کیبل منقطع کر دیا گیا ہے تاکہ کوئی چیز براہ راست نشر نہ ہو۔
اجلاس شروع ہونے سے قبل وزیر اعظم قومی اسمبلی پہنچ گئے۔ آج آرمی ایکٹ میں ترامیم ہوں گی۔ پارلیمنٹ کا کیبل منقطع کر دیا دیا گیا ہے تاکہ کوئی چیز براہ راست نشر نہ ہو۔
— Inamullah Khattak (@Khan_Inam1) January 7, 2020
انعام اللہ خٹک کی ٹویٹ کا جواب دیتے ہوئے ایک اور صحافی انس ملک نے بتایا کہ اسمبلی کارروائی کو پی ٹی وی پر براہ راست دکھایا جا رہا ہے لیکن پارلیمنٹ کے ہاؤس ٹی وی پر نہیں دکھایا جا رہا۔
So, Parliament’s corridor during the voting only displayed PTV in the Press Gallery and not the house TV which can be easily be viewed during in the House with regards to all of the proceedings. This as PM Khan was present in the assembly and the amendment acts were tabled. https://t.co/fr4oK1UzKk
— Anas Mallick (@AnasMallick) January 7, 2020
واضح رہے کہ سپیکر قومی اسمبلی اسد قیصر کی زیرِ صدارت ایوان کا اہم اجلاس منعقد ہوا جس میں وزیراعظم عمران خان نے بھی شرکت کی، اجلاس میں سروسز ایکٹس میں ترامیم سے متعلق تینوں بلز پر شق وار منظوری لی گئی۔
ایوانِ زیریں میں پاک آرمی ایکٹ 1952، پاک فضائیہ ایکٹ 1953 اور پاک بحریہ ایکٹ 1961 میں ترامیم کے لیے علیحدہ علیحدہ بلز پیش کیے گئے۔ مذکورہ ترامیمی بلز کو پاکستان آرمی ( ترمیمی) بل 2020، پاکستان نیوی (ترمیمی) بل 2020 اور پاکستان ایئر فورس (ترمیمی) بل 2020 کے نام دیے گئے۔
اجلاس کے آغاز پر قومی اسمبلی کی قائمہ کمیٹی برائے دفاع کے چیئرمین امجد علی خان نے پاکستان آرمی (ترمیمی) بل سے متعلق قائمہ کمیٹی کی رپورٹ پیش کی۔ جس کے بعد وزیر دفاع پرویز خٹک نے پاکستان پیپلز پارٹی سے درخواست کی کہ وہ ان تجاویز کو واپس لے لیں جو انہوں نے دی ہیں تاکہ ترامیمی بلز پر اتفاق رائے قائم ہو سکے جس پر پیپلز پارٹی نےحکومت کی درخواست پر اپنی سفارشات واپس لے لیں۔ تاہم جمعیت علمائے اسلام (ف)، جماعت اسلامی اور قبائلی اضلاع کے ارکان نے احتجاجاً ایوان سے واک آؤٹ کر دیا۔
قومی اسمبلی میں آرمی (ترمیمی) بل 2020 کی شق وار منظوری کا آغاز ہوا اور اسپیکر کی جانب سے شق وار رائے شماری کروانے کے بعد بل منظور کر لیا گیا۔ ایوان میں پاکستان ایئر فورس اور نیوی ترامیمی بلز 2020 کو بھی شق وار منظوری کے عمل کے بعد اکثریت سے منظور کر لیا گیا۔
بلوں کی منظوری کے بعد قومی اسمبلی کا اجلاس کل (8 جنوری) شام 4 بجے تک ملتوی کر دیا گیا ہے۔
واضح رہے کہ 3 جنوری کو ایوانِ زیریں میں پاک آرمی ایکٹ 1952، پاک فضائیہ ایکٹ 1953 اور پاک بحریہ ایکٹ 1961 میں ترامیم کے لیے علیحدہ علیحدہ بل وزیر دفاع پرویز خٹک نے پیش کیے تھے۔
اس سے قبل یکم جنوری کو پاکستان تحریک انصاف (پی ٹی آئی) کی وفاقی حکومت نے کابینہ کے ہنگامی اجلاس میں آرمی ایکٹ پر ترامیم کی منظوری دی تھی۔
وزیر قانون فروغ نسیم نے قومی اسمبلی کی قائمہ کمیٹی کے اجلاس میں ترامیمی بلز کے مختلف پہلوؤں پر بریفنگ دی تھی۔