اس بات کا اعلان وفاقی وزیر توانائی حماد اظہر نے سماجی رابطوں کی ویب سائٹ ٹویٹر پر جاری ایک بیان میں کیا۔ ان کا کہنا تھا کہ ایسے صارفین جو زیادہ بجلی استعمال کرینگے انھیں فی یونٹ 5 سے 7 روپے تک کا ڈسکاؤنٹ فراہم کرینگے۔ صارفین کو یہ ریلیف رواں سال نومبر سے فروری 2022ء تک کے عرصے میں دیا جائے گا۔
حماد اظہر نے بتایا کہ یہ سیزنل پیکج وفاقی کابینہ کی جانب سے منظور کیا گیا ہے۔ ان کا کہنا تھا کہ ریلیف حاصل کرنے والوں میں کمرشل اور رہائشی بجلی استعمال کرنے والے دونوں صارفین ہونگے۔
The cabinet has approved the seasonal electricity package. Any additional electricity consumed by domestic and commercial consumers during nov-feb period compared to same time previous year will have a discount of Rs 5 to 7 per each unit.
— Hammad Azhar (@Hammad_Azhar) October 5, 2021
خیال رہے کہ فواد چودھری نے کابینہ اجلاس کے بعد میڈیا سے گفتگو میں کہا تھا کہ وزارت توانائی کی جانب نیپرا کو یہ تجویز بھیجی گئی تھی کہ موسم سرما میں گیس ہیٹرز کو بجلی پر منتقل ہونے والے صارفین کیلئے فی یونٹ میں 7 روپے تک کا ریلیف دیا جائے گا۔
انہوں نے ملک میں گیس کی قلت اور بجلی کی فراوانی کو گزشتہ حکومت کی مہربانی قرار دیتے ہوئے کہا کہ ہم چاہتے ہیں کہ موسم سرما میں گیس کا استعمال کم سے کم ہو۔
خیال رہے کہ وفاقی حکومت نے پاکستانی عوام کو بجلی کا بڑا جھٹکا دیتے ہوئے فی یونٹ قیمت میں 3 روپے کا اضافہ کر دیا ہے، حالیہ اضافے کے بعد شہریوں کو ایک یونٹ کے بدلے 18 روپے سے زائد ادا کرنا پڑیں گے۔ نیشنل الیکٹرک پاور ریگولیٹری اتھارٹی ( نیپرا) کی جانب سے جاری نوٹیفیکیشن میں کہا گیا ہے کہ بجلی کی قیمتوں میں حالیہ اضافہ سہ ماہی فیول پرائس ایڈجسٹمنٹ کی مد میں کیا ہے۔
نیپرا نوٹیکیشن کے مطابق یکم اکتوبر سے 1.65 روپے فی یونٹ سہ ماہی فیول پرائس ایڈجسٹمنٹ عائد کی گئی ہے جس سے بجلی کی فی یونٹ قیمت بڑھ کر اب 18.16 روپے فی یونٹ ہوگئی ہے جبکہ اس فیصلے سے عوام پر 90 ارب روہے کا بوجھ پڑے گا۔
نیپرا کی جانب سے کہا گیا ہے کہ اس فیصلے کا اطلاق 300 یونٹ سے زائد استعمال کرنے والے صارفین پر ہو گا، کے الیکٹرک صارفین اس سے مستشنیٰ رہینگے۔ خیال رہے کہ پاکستان میں 80 فیصد صارفین ماہانہ 300 یا اس سے زائد یونٹس کا استعمال کرتے ہیں۔
اعلامیے کے مطابق گزشتہ مالی سال کی پہلی اور دوسری سہ ماہی کے تحت فی یونٹ بجلی 89 پیسے، تیسری میں 67 اور چوتھی سہ ماہی کی مد میں 83 پیسے مہنگی کی گئی۔