شیخوپورہ میں کھیتوں میں کام کے دوران گندم کی کٹائی کے معاملے پر 2 گروہوں میں فائرنگ کے تبادلے میں ہلاک افراد کی تعداد 8 ہو گئی۔
ذرائع کے مطابق شیخوپورہ میں کھاریانوالہ فیصل آباد روڑ پر گندم کے کھیتوں میں کٹائی کے دوران دو گروپوں میں لڑائی ہوئی، ایک گروہ کی فائرنگ سے 2 خواتین سمیت 8 افراد ہلاک اور 2 زخمی ہوئے۔
ذرائع کا بتانا ہے کہ 8 افراد کے قتل کے واقعے پر مقتولین کے حامیوں نے مخالفین کے گھروں پر دھاوا بول دیا۔
مقتولین کے حامیوں نے مخالفین کے گھروں پر پیٹرول اور مٹی کا تیل چھڑک کر آگ لگا دی، امدادی ٹیمیں آگ بجھانے میں مصروف ہیں۔
مقامی ذرائع کا بتانا ہے کہ دونوں گروپوں کے درمیان پرانی دشمنی چلی آ رہی تھی اور ایک ماہ قبل بھی دونوں فریقین کے درمیان بچوں کی لڑائی کے معاملے پر تین مقدمات درج ہوئے تھے۔
وزیراعلیٰ پنجاب سردار عثمان بزدار اور آئی جی پنجاب نے واقعہ کا نوٹس لیتے ہوئے آر پی او شیخوپورہ سے رپورٹ طلب کر لی ہے۔
آئی جی پنجاب کا کہنا ہے کہ ملزمان کو گرفتار کرکے سخت قانونی کارروائی کی جائے گی۔
