سابق وزیراعلی پنجاب عثمان بزدار نے موجودہ وزیراعلی پرویزالہی کے الزامات پر اپنا ردعمل دیتے ہوئے کہا ہے کہ ان پر تنقید تحریک انصاف کے اینجنڈے پر تنقید کے مترادف ہے۔
عثمان بزدار کا کہنا تھا کہ انہوں نے اپنے دور حکومت میں کسی کو سیاسی انتقام کا نشانہ نہیں بنایا اور ان کے پاس کافی کچھ کہنے کو ہے مگر وہ ابھی کچھ کہنا نہیں چاہتے۔
ان کا مزید کہنا تھا کہ ان کی پارٹی تحریک انصاف کی مسلم لیگ (ق) کے ساتھ اتحادی حکومت تھی اور اس طرح کے سیاسی اتحاد میں اس طرح کی باتیں ہوتی رہتی ہیں۔
وزیراعلی پرویز الہی نے اتوار کو اپنے ایک انٹرویو میں سابق وزیراعلی عثمان بزدار کو تنقید کا نشانہ بناتے ہوئے کہا تھا کہ انہوں نے اپنے دور حکموت میں صوبے کو تباہ کر کے رکھ دیا تھا۔ پرویز الہی نے مزید کہا کہ انہوں نے چار ماہ انتہائی محنت سے کام کر کے پنجاب میں چیزیں ٹھیک کرنے کی کوشش کی ہے۔
