'اسے بتاؤ کہ ہم بیرکوں میں رہنے کے عادی ہیں'

گزشتہ روز اپنے تقریر کے دوران سربراہ پی ٹی آئی عمران خان  نے کہا تھا کہ آصف زرداری کو بھی دیکھ رہا ہوں کہ وہ جیل جاتے ہی اسپتال پہنچ جاتے ہیں، آپ کو بھی ہم جیل میں رکھیں گے جہاں ٹی وی اور ایئرکنڈیشنر نہیں ہوگا، انکے اس بیان پر ردعمل دیتے ہوئے سابق صدر آصف علی زرداری کا کہنا تھا کہ  اسے بتاؤ کہ ہم بیرکوں میں رہنے کے عادی ہیں۔

اسلام آباد کی احتساب عدالت میں پیشی کے موقع پر آصف علی زرداری نے صحافیوں سے غیر رسمی گفتگو کی۔

ایک صحافی کی جانب سے سوال کیا گیا کہ عمران خان کہہ رہے ہیں کہ امریکا سے واپسی پر آپ سے تمام سہولیات واپس لے لیں گے؟

جس پر آصف علی زرداری کہا کہ سہولتیں کونسی ہیں جو واپس لے لیں گے، اسے بتاؤ کے ہم پہلے ہی بیرکوں میں رہنے کے عادی ہیں۔

دوران گفتگو چیئرمین سینیٹ سے متعلق سوال پر سابق صدر کا کہنا تھا کہ چیئرمین سینیٹ نہ میں نے بنایا ہے نہ میں انہیں اتارنے جارہا ہوں۔

اس پر صحافی نے سوال کیا کہ وہ کہتے ہیں کہ چیئرمین سینیٹ نہیں ہوں گے تو ڈپٹی چیئرمین بھی نہیں ہوگے؟ جس پر آصف زرداری نے کہا کہ یہ ان کی اپنی مرضی ہے۔