پاکستان تحریک انصاف ( پی ٹی آئی) نے حکومت کی جانب سے جوڈیشل کمیشن کے قیام کا اعلان نہ کرنے پر مذاکرات ختم کرنے کا اعلان کردیا، چیئرمین بیرسٹر گوہر کا کہنا ہے کہ عمران خان نے کمیشن کا اعلان نہ کرنے پر مذاکرات ختم کرنے کا کہہ دیا ہے۔
نیا دور کے مطابق اڈیالہ جیل کے باہر میڈیا سے گفتگو کرتے ہوئے بیرسٹر گوہر نے کہا کہ عمران خان نےکمیشن کا اعلان نہ کرنے پر مذاکرات ختم کرنےکا کہہ دیا ہے، پی ٹی ائی کی مذاکرات کی خواہش مند تھی، حکومت کی طرف سے تعاون نہ کرنے پر مذاکرات ختم کیے۔
چیئرمین پی ٹی آئی نے کہا کہ کمیشن کا اعلان نہ ہونے کی صورت میں مذاکرات اگے نہیں بڑھ سکتے، 3 ججز پر مشتمل کمیشن بننے کی صورت میں مذاکرات کیے جا سکتے ہیں۔
انہوں نے کہا کہ پانی پی ٹی ائی کا کہنا ہے کہ ہم آئین اور قانون کے تحت اپنی کوشش جاری رکھیں گے، پانی پی ٹی ائی کی ہدایت پر تمام اپوزیشن جماعتوں کے ساتھ مل کر جدوجہد کریں گے۔
بیرسٹر گوہر نے کہا کہ پاکستان تحریک انصاف کوکسی بیرونی مددکاانتظارنہیں، عمران خان اپنامقدمہ پاکستانی عدالتوں میں ہی لڑیں گے اور پاکستانی عدالتوں سے ہی ریلیف لےکرباہرآئیں گے۔
چیئرمین پی ٹی آئی کا کہنا تھا آج بانی پی ٹی آئی سے میری اور باقی وکلا کی ملاقات ہوئی، بانی پی ٹی آئی نے واضح کیا کہ کمیشن نہیں بنایا لہذا مذاکرات ختم کرتے ہیں، بانی پی ٹی آئی نے کہا مذاکرات کے مزید راؤنڈز نہیں ہوں گے۔
بیرسٹرگوہر کا کہنا تھا ہماری تو بڑی خواہش تھی کہ مذاکرات جاری رہیں اور معاملات آگے بڑھیں لیکن شاید سیاسی اختلافات کی ٹھنڈک اتنی زیادہ ہے کہ اس سے برف پگھل نہیں رہی، افسوس کی بات ہے کہ حکومت کی طرف سے آج تک کوئی اعلان نہیں ہوا۔
ان کا کہنا تھا کمیشن بننا ہے تو ارکان سپریم کورٹ یا ہائیکورٹ کے 3 سینئر ججز سے ہونے چاہئیں، ہم آئین اور قانون کے مطابق اپنی جدوجہد جاری رکھیں گے، آزاد عدلیہ اور 26ویں ترمیم کیخلاف کوشش کریں گے۔
بیرسٹرگوہر کا کہنا تھا بانی پی ٹی آئی کہہ چکے ہیں کہ ہمیں کسی بیرون ملک کی مدد کا انتظار نہیں ہے، ساری سیاسی جماعتوں کیساتھ ملکر جدوجہد شروع کریں گے۔
یاد رہے کہ گزشتہ روز پاکستان تحریک انصاف کے رہنما اور قومی اسمبلی میں قائد حزب اختلاف عمر ایوب نے بھی کہا تھا کہ اگر حکومت جوڈیشل کمیشن کا اعلان نہیں کرتی تو مذاکرات آگے نہیں بڑھیں گے۔
دوسری جانب حکومتی مذاکراتی کمیٹی کے رکن اور وزیر اعظم کے مشیر برائے سیاسی امور رانا ثنا اللہ کا کہنا تھا حکومتی کمیٹی ایک دو روز میں تحریک انصاف کے مطالبات کا تحریری جواب پیش کر دے گی۔