ریاست طلبہ یکجہتی مارچ کی راہ میں رکاوٹیں حائل نہ کرے

ایچ آر سی پی کو ایسی اطلاعات پر تشویشناک ہے کہ مارچ کی حمایت کرنے والے طالبعلموں کو ہراساں کیا جا رہا ہے، یونیورسٹی سے یا ان کے ہوسٹلوں سے نکالا جا رہا ہے تاکہ انہیں مارچ میں شامل ہونے سے روکا جا سکے۔یہ ان کے حقِ اجتماع کی کھُلی خلاف ورزی ہے۔ اس کے علاوہ، مارچ کے حامیوں کی کردار سازی کے لیے سوشل میڈیا پر ہونے والا پراپیگنڈہ نہ صرف گھناؤنا ہے بلکہ یہ اُنہیں نقصان سے بھی دوچار کر سکتا ہے۔

ایچ آر سی پی کو یہ جان کر بھی افسوس ہوا ہے کہ کوئٹہ میں گورنر سیکریٹریٹ نے جامعہ بلوچستان کو ایک نوٹیفکیشن جاری کیا ہے جس میں ہر قسم کی سیاسی سرگرمی اور اجتماعات پر پابندی عائد کی گئی ہے اور سیکیورٹی کے عملے کو ایسی سرگرمیوں کو روکنے کا واضح اختیار دیا گیا ہے۔ایچ آر سی پی نے ریاست سے  طلبہ یک جہتی مارچ کے مطالبات کو سنجیدہ لینے کا مطالبہ کیا ہے۔ طالبعلموں کو فیسوں میں اضافے اور اعلیٰ تعلیم کے بجٹ میں کٹوتی کے خلاف احتجاج کرنے اور تعلیمی اداروں میں سیکیورٹی فورسز کی غیرضروری مداخلت کے خاتمے،  ہراسانی کے خلاف فعال کمیٹیوں کی تشکیل جس میں طلباء کی نمائندگی بھی ہو اور سب سے بڑھ کر، طلباء یونینوں کی بحالی کا مطالبہ کرنے کا حق ہے۔ ایچ آر سی پی بروز جمعہ ملک بھر میں یک جہتی مارچ میں حصہ لینے والے طالبعلموں کے ساتھ کھڑا ہے۔