بھارت مقبوضہ کشمیر میں کیا کرنے جا رہا ہے؟

مقبوضہ کشمیر غیر یقینی صورت حال سے دوچار ہے، وادی سے ہندو یاتریوں، سیاحوں اور غیر کشمیری طلبا کو واپس لوٹنے کے حکم سے عوام اور سیاسی حلقوں میں کھلبلی مچی ہوئی ہے۔ بھارت نے سیکیورٹی وجوہات کا حوالہ دیتے ہوئے ہندو زائرین اور سیاحوں کو مقبوضہ وادی سے جلد چلے جانے کی ہدایت کی ہے۔ اس ہدایت اور سیکیورٹی فورسز کی تعداد میں اضافے کے باعث کشمیری شہری ممکنہ کریک ڈاؤن سے پریشان ہیں۔

بھارت نے حال ہی میں مقبوضہ وادی میں سیکیورٹی فورسز کی تعداد میں اضافہ بھی کیا اس اضافے سے قبل بھی مقبوضہ وادی میں پانچ لاکھ سے زیادہ سیکیورٹی اہلکار تعینات ہیں۔ فورسز کی تعداد میں اضافے اور غیر کشمیریوں کو وادی سے نکل جانے کی ہدایات سامنے آنے کے بعد کئی خبریں سامنے آرہی ہیں جن میں بھارت کے ان فیصلوں کی ممکنہ وجوہات بیان کی جارہی ہیں۔

اس سب کے پیچھے بھارتی حکومت کیا مقاصد حاصل کرنا چاہتی ہے یا اس کے عزائم کیا ہیں، اس میں پہلے نمبر پر آتا ہے ایک بڑا کریک ڈاؤن جو آزادی پسندوں کے خلاف کیا جا سکتا ہے۔ ان تازہ بھارتی اقدامات کے بعد کشمیری شہریوں کو خدشہ ہے کہ حکومت مظاہرین کے خلاف نیا کریک ڈاؤن شروع کرنے کا ارادہ رکھتی ہے۔

یہ خدشہ بھی ظاہر کیا جارہا ہے کہ بھارت مقبوضہ وادی کی خصوصی حیثیت ختم کرنا چاہتی ہے اور ممکنہ احتجاج سے نمٹنے کے لیے یہ اقدامات اٹھائے جا رہے ہیں۔

مودی حکومت اپنے انتخابی منشور کے مطابق بھارتی آئین کے آرٹیکل 35 اے کو ختم کرنا چاہتی ہے، جس کے بعد بھارتی شہری کشمیر میں جائیدادیں خرید سکیں گے۔ حریت رہنماؤں کے علاوہ بھارت نواز سمجھے جانے والے کشمیری رہنما بھی ایسے کسی بھی ممکنہ اقدام کی مخالفت کر رہے ہیں۔

نیوز ایجنسی روئٹرز سے گفتگو کرتے ہوئے کشمیری رہنما میر واعظ عمر فاروق نے کہا ہے کہ آرٹیکل 35 اے کو ختم کر کے ریاست کی مسلم اکثریتی شناخت کو بدل دینے کی کوششیں کرنے سمیت کئی افواہیں اس وقت گردش کر رہی ہیں۔ ماضی کی طرح اب بھی عوام اور رہنماؤں کو ایسے اقدامات کے خلاف مزاحمت کے لیے تیار رہنا ہو گا۔

کشمیری شہریوں کے خدشات اور موجودہ غیر یقینی صورت حال کے بارے میں ٹویٹ کرتے ہوئے بھارت نواز کشمیری رہنما عمر عبداللہ نے لکھا ہے کہ میرے کئی سوالات ہیں لیکن جواب ایک بھی نہیں۔ آج میری کشمیر سے متعلق اہم عہدوں پر فائز کئی لوگوں سے ملاقات ہوئی اور ان میں سے کوئی بھی کچھ بھی نہیں بتا پایا اور میں 6 سال تک کشمیر کا وزیر اعلیٰ رہا ہوں۔ تو عام کشمیریوں کے مصائب کے بارے میں سوچیے، جنہیں یہ بھی معلوم نہیں کہ وہ کس بات پر یقین کریں۔

I have so many questions & not a single answer. I’ve met people today who occupy important positions to do with J&K, not one of them was able to tell me anything and I’ve been CM for 6 years. Imagine the plight of your everyday Kashmiri who doesn’t know what to believe.

— Omar Abdullah (@OmarAbdullah) August 2, 2019

حالیہ دنوں کے دوران لائن آف کنٹرول پر بھی کشیدگی میں اضافہ ہوا ہے، بھارت فائر بندی معاہدے کی خلاف ورزی کر رہا ہے، بھارتی فائرنگ اور گولہ باری سے پاکستان کے عام شہری شہید ہو رہے ہیں۔