پاکستان میں معصوم بچیوں کیساتھ انسانیت سوز واقعات کا سلسلہ تھم سکا۔ مانانوالہ پولیس سٹیشن کی حدود میں چار سالہ معصوم بچی کو جنسی زیادتی کا نشانہ بنا دیا گیا۔
تفصیلات کے مطابق متاثرہ بچی کا تعلق مسیحی خاندان سے بتایا جا رہا ہے۔ یہ بچی گذشتہ روز اپنے گھر کے باہر کھیل رہی تھی کہ عثمان نامی ملزم اسے بہلا پھسلا کر اپنے گھر لے گیا اور درندگی کا نشانہ بنا دیا۔
مانانوالہ پولیس نے وقوعہ کی اطلاع ملتے ہی اوباش نوجوان ملزم عثمان کو گرفتار کرکے کارروائی شروع کردی ہے۔ کرسچین کمیونٹی نے مانانوالہ پولیس کو بروقت کارروائی کرکے بچی سے زیادتی کرنے والے درندہ صفت ملزم کی فوری گرفتاری پر کارکردگی کو سراہا ہے۔
پولیس کا میڈیا سے گفتگو کرتے ہوئے کہنا تھا کہ ملزم کو قرار واقعی سزا دلوانے کے لئے ہر ممکن کوشش کی جائے گی۔ ایسے مجرم معاشرے کا ناسور ہیں جن کا قلع قمع کرنا اولین ترجیح ہے۔ متاثرہ گھرانے کے ساتھ ہر ممکن تعاون کا عمل یقینی بنایا جائے گا اور کسی قسم کی غفلت یا لاپروائی نہیں برداشت کی جائے گی۔
