حکومت پاکستان اور کرونا وائرس کی صورتحال کے بارے میں مرکزی فیصلہ ساز ادارے این سی او سی نے 80 فیصد کاروباری مراکز کھولنے کی اجازت دے دی ہے جس کے بعد اب شادی ہالز اور تعلیمی اداروں کے علاوہ تقریباً سب کچھ کھول دیا گیا ہے جبکہ کاروباری مراکز کے اوقات بھی لا محدود کر دیئے گئے ہیں۔
لیکن اس تمام صورتحال پر پاکستان میڈیکل ایسو سی ایشن نے اپنے شدید تحفظات کا اظہار کیا ہے۔ اور اپنے ایک اعلامیے میں کہا ہے کہ حکومت کی جانب سے یہ جلد بازی خطرناک ہے۔
عید الاضحیٰ پر ہوئے اکٹھ اور نمازوں کے بڑے اجتماعات کے اثرات کے بارے میں معلوم ہونے کے لئے 10 سے 15 روز درکار ہونا تھے جبکہ اب 14 اگست پر بھی لوگ اکھٹے ہوں گے ساتھ ہی ساتھ محرم الحرام پر ہونے والی مجالس اور جلوسوں سے بھی کرونا کے پھیلنے کے شدید خطرات لاحق ہیں جن کا انتظار کیے بغیر سب کچھ کھولنا بہت مہنگا پڑ سکتا ہے۔
