وفاقی وزیر سائنس و ٹیکنالوجی فواد چوہدری نے سماجی رابطوں کی ویب سائٹ ٹویٹر پر مقبوضہ کشمیر کی صورتحال پر سخت تشویش کا اظہار کیا ہے، بھارتی اقدامات کی مذمت کرنے کیساتھ ساتھ وہ اپنی ہی حکومت سے سخت اقدامات اٹھانے کا مطالبہ بھی کر رہے ہیں۔
فواد چوہدری نے اپنی ٹویٹ میں لکھا کہ "ظلم رہے اور امن بھی ہو، کیا ممکن ہے تم ہی کہو، مقبوضہ کشمیر میں بدترین مارشل لا مسلط ہے ہر آٹھ کشمیریوں پر ایک بھارتی فوجی مسلط ہے، تحریر کی آزادی ہے نہ تقریر کی، انٹرنیٹ معطل ہے تمام کشمیری لیڈر شپ قید و بند میں ہے، ان حالات میں کیا بات چیت ہونی ہے۔"
ظلم رہے اور امن بھی ہو ۔۔۔ کیا ممکن ہے تم ہی کہو ، مقبوضہ کشمیر میں بدترین مارشل لا٘ مسلط ہے ہر آٹھ کشمیریوں پر ایک بھارتی فوجی مسلط ہے، تحریر کی آزادی ہے نہ تقریر کی، انٹرنیٹ معطل ہے تمام کشمیری لیڈر شپ قید و بند میں ہے، ان حالات میں کیا بات چیت ہونی ہے،
— Ch Fawad Hussain (@fawadchaudhry) August 8, 2019
ایک دوسری ٹویٹ میں وفاقی وزیر سائنس و ٹیکنالوجی نے لکھا کہ " پاکستانیوں اپنے وجود کا احساس نہ دلایا تو ویسے ہی مٹ جاؤ گے، مسئلہ کشمیر کا نہیں مملکت پاکستان کے وجود کا ہے، آج کشمیر جل رہا ہے امریکہ کیا کہتا ہے، عرب کیا کرتے ہیں یہ چھوڑو تم کیا کرتے ہو اہم ہے، مٹ جائیگی مخلوق تو انصاف کرو گے، منصف ہو تو حشر اٹھا کیوں نہیں دیتے"
پاکستانیوں اپنے وجود کا احساس نہ دلایا تو ویسے ہی مٹ جاؤ گے، مسئلہ کشمیر کا نہیں مملکت پاکستان کے وجود کا ہے، آج کشمیر جل رہا ہے امریکہ کیا کہتا ہے، عرب کیا کرتے ہیں یہ چھوڑو تم کیا کرتے ہو اہم ہے ۔۔۔ مٹ جائیگی مخلوق تو انصاف کرو گے۔۔۔۔ منصف ہو تو حشر اٹھا کیون نہیں دیتے
— Ch Fawad Hussain (@fawadchaudhry) August 8, 2019
فواد چوہدری نے بدھ 7 اگست کو اسمبلی کے مشترکہ اجلاس میں اظہار خیال کرتے ہوئے بھی سخت مؤقف اپنایا تھا، انہوں نے کہا تھا کہ اپنی سیاست کے پیچھے ہمارے بچوں کی بے حرمتی نہ کریں، کل جو ہوا اور آج جو ہو رہا ہے، پیغام اچھا نہیں جارہا۔ ہمیں فوری طور پر بھارت سے سفارتی تعلقات ختم کرنے چاہئیں، کشمیر کو فلسطین نہیں بننے دیں گے، جنگ مسلط ہوئی تو کشمیر کے لیے کٹ مریں گے۔
فواد چوہدری کا مزید کہنا تھا کہ کل عمران خان نے کہا کیا میں بھارت پر حملے کا حکم دے دوں، اس وقت شہباز شریف اور بلاول کو کھڑے ہو کر کہنا چاہیے تھا، قدم بڑھاؤ ہم تمہارے ساتھ ہیں، یہ تاثر نہیں دینا چاہیے کہ ہم کوئی جنگ لڑنے سے بھاگ رہے ہیں۔