قصور کے علاقے کھڈیاں خاص میں 10 سالہ بچی کو زیادتی کا نشانہ بنانے والا مجرم عدالت سے عبوری ضمانت پر رہا کر دیا گیا تاہم متاثرہ بچی کے چچا نے ملزم کو اسکے وکیل کے چیمبر جا کر گولی مار دی جس سے وہ موقع پر ہلاک ہوگیا۔ اطلاعات کے مطابق قصور کی کچہری میں ملزم اسلم عرف ملنگی ضمانت پر رہا ہو کر اپنے وکیل سجاد بخاری کے چیمبر میں بیٹھا تھا کہ متاثرہ بچی کے چچا محمد یسٰین وہاں پہنچے اور ملزم پر گولیاں چلائیں جس سے وہ موقع پر ہی جاں بحق ہوگیا۔ گولیوں سے چیمبر میں بیٹھے دیگر افراد بھی زخمی ہوئے۔ پولیس نے موقع پر پہنچ کر ملزم کو گرفتار کر لیا اور اس سے آلہ قتل بر آمد کر لیا جبکہ زخمیوں کو ہسپتال پہنچا دیا گیا ۔ ملزم یسٰین کا کہنا ہے کہ پولیس و دیگر اداروں نے ہمارے ساتھ تعاون نہیں کیا اسی لئے تنگ آکر اس نے یہ انتہائی اقدام اٹھایا۔