ضلع نارووال میں پریس کلب 1998 میں ضلعی حکومت نے کچہری روڈ پر قائم کیا تھا۔ حکومت کی مدد سے اسے 2013 میں دوبارہ تعمیر کیا گیا۔ عمارتوں اور انفراسٹرکچر پر بھاری رقم خرچ کی گئی۔ تعمیر ہونے پر وعدے کیے گئے، صحافی ضلع نارووال کے لیے بہتر کریں گے اور ہر ذمہ داری پوری کریں گے، لیکن بدقسمتی سے آج نارووال میں پریس کلبوں کے بند دروازوں اور ان پر لگے تالوں نے بہت سے صحافیوں کو سیکھنے اور پریس کلبوں سے دور رہنے پر مجبور کر دیا ہے۔ نارووال میں پریس کلب کی عمارتوں کی بندش نے بہت سے صحافیوں کو ایک مخصوص پلیٹ فارم پر جمع ہونے کے موقع سے محروم کر دیا ہے۔ آج نارووال میں پریس کلب کی تقریباً 12 تنظیمیں ہیں جن میں سے ہر ایک کا اپنا اپنا ایجنڈا ہے۔ کوئی ایک دوسرے سے بات نہیں کرنا چاہتا اور نہ کوئی مخالف جماعتوں کے لیے پریس کلب کے دروازے کھولنا چاہتا ہے۔
ضلع نارووال 17 لاکھ سے زیادہ لوگوں کا گھر ہے۔ نارووال شہر میں تین پریس کلب رجسٹرڈ ہیں جن میں نیشنل پریس کلب، ڈسٹرکٹ پریس کلب اور نارووال پریس کلب شامل ہیں اور باقی تمام غیر رجسٹرڈ ہیں۔ شہر میں صرف ایک سرکاری عمارت ہے۔ دوسری عمارت شکرگڑھ تحصیل میں اور تیسرا پریس کلب ظفروال میں ہے جس کی کوئی سرکاری عمارت نہیں ہے۔
تاہم ان میں سرکاری عمارت میں بنے پریس کلبوں میں ہر سال میں ایک بار صحافی جمع ہوتے ہیں اور صدر کا انتخاب کرتے ہیں جو اس عہدے پر برسوں تک برقرار رہتا ہے۔
نیشنل پریس کلب نارووال کے صدر عبدالحق کے مطابق پرنٹ اور الیکٹرانک میڈیا سے وابستہ کوئی بھی شخص ان پریس کلبوں کی ممبر شپ حاصل کر سکتا ہے اور اس وقت تقریباً 25 سینیئر صحافی نیشنل پریس کلب کے ممبر ہیں۔ تاہم انہوں نے نارووال پریس کلب کے آئین کو شیئر نہیں کیا۔ عبدالحق یہ بھی تسلیم کرتے ہیں کہ ان کو اپنے پریس کلب کے لیے کبھی کسی سے کسی قسم کی فنڈنگ نہیں ملی۔ انہوں نے وضاحت کرتے ہوئے کہا؛ 'ہر کوئی اپنا کام کر رہا ہے، اس لیے کسی کے پاس پریس کلب کھولنے یا اس میں بیٹھنے کا وقت نہیں ہے۔ ہم پریس کلب کی چابیاں کسی ایسے شخص کو دیں گے جو وہاں کام کرنا چاہے گا لیکن ہم مخالف جماعتوں کو اس پریس کلب میں داخل ہونے کی اجازت نہیں دے سکتے۔ ہم پریس کلب کو صحیح طریقے سے فعال نہیں کر سکتے کیونکہ ہم ایک چھوٹے سے شہر میں رہتے ہیں'۔
اسی طرح شکر گڑھ پریس کلب نارووال کی سب سے بڑی تحصیل میں سرکاری فنڈز سے بنایا گیا۔ 2013 میں اس کی تعمیر نو کی گئی اور تعمیر اور بنیادی ڈھانچے پر بھاری رقم خرچ کی گئی۔ بہرحال شکر گڑھ کا پریس کلب بھی کبھی فعال نہیں رہا۔ شکر گڑھ پریس کلب کے کبھی منتخب نہ ہونے والے موجودہ صدر دلشاد شریف کا کہنا ہے کہ 'پریس کلب کے بند ہونے کی کوئی خاص وجہ نہیں ہے۔ وجہ صرف یہ ہے کہ پریس کلب میں ممبرشپ رکھنے والا اپنا کاروبار کر رہا ہے اور پریس کلب کے لیے کسی کے پاس وقت نہیں ہے۔ یہی وجہ ہے کہ پریس کلب برسوں سے بند یا غیرفعال ہے'۔ دلشاد شریف نے اعتراف کیا کہ انہیں پریس کلب شکر گڑھ کے لیے کبھی کوئی فنڈنگ نہیں ملی سوائے چند سالوں کے جب وہ صدر نہیں تھے۔ ان کا کہنا ہے کہ شکر گڑھ ایک چھوٹا شہر ہے، چھوٹے شہروں میں پریس کلب فعال نہیں رہ سکتے۔
جیو نیوز کے رپورٹر اور شکر گڑھ پریس کلب کی موجودہ باڈی کے رکن منظور حسین نے کہا کہ ان کے پاس پریس کلب شکر گڑھ کا آئین نہیں ہے کیونکہ یہ 20 سال سے زیادہ پہلے بنا تھا اور ذمہ داران نے اسے اپ ڈیٹ کرنے کے بارے میں کبھی نہیں سوچا۔ منظور حسین کے خیال میں نارووال میں پریس کلب کھولنا ملک کا سب سے بڑا مسئلہ یا قومی مسئلہ نہیں ہے اور شہر میں اس سے زیادہ اہم مسائل ہیں۔ 'ہمارے تقریباً 40 ممبران ہیں اور ہمارے صدر دلشاد شریف پریس کلب شکر گڑھ کے ہمارے ہمیشہ کے لیے صدر ہیں'۔
دوسری جانب ڈپٹی کمشنر نارووال نے ایک آر ٹی آئی کے جواب میں بتایا کہ 'جنوری 2018 سے دسمبر 2022 تک نارووال میں کسی پریس کلب کو کوئی فنڈ جاری نہیں کیا گیا'۔
ایک مقامی صحافی کے مطابق حال ہی میں یکم اگست کو ڈی سی نارووال اور ڈسٹرکٹ انفارمیشن ڈیپارٹمنٹ کے افسران کے ساتھ نارووال میں میٹنگ ہوئی جس میں نارووال کے تمام پریس کلبوں بشمول رجسٹرڈ اور نان رجسٹرڈ کو تقریباً 20 لاکھ روپے کی امداد دی گئی۔ نارووال پریس کلب کے لیے 10 لاکھ، شکر گڑھ پریس کلب کے لیے 5 لاکھ اور تحصیل ظفروال پریس کلب کے لیے 5 لاکھ روپے کی امداد۔
55 سالہ محمد عابد نارووال سے ڈان اخبار سے وابستہ ہیں اور تحقیقاتی صحافی ہیں۔ ان کے مطابق 'نارووال کے پریس کلبوں میں ایسی لابیاں ہیں جو سیاسی جماعتوں کے کارکن بھی ہیں۔ نارووال کے پریس کلب کی عمارت پر حکومت نے بہت پیسہ خرچ کیا ہے'۔ عابد نے صحافت میں 30 سال کام کیا لیکن ابھی تک ان کے پاس نارووال پریس کلب کی ممبرشپ نہیں ہے۔
انہوں نے واضح کیا کہ 'پریس انفارمیشن ڈیپارٹمنٹ کو ایک شہر میں ایک سے زیادہ پریس کلبز کو رجسٹرڈ نہیں کرنا چاہئیے کیونکہ صرف اسی طرح تمام صحافی بیٹھ کر اپنے مسائل حل کر سکتے ہیں'۔
نارووال میں نئے تعینات ہونے والے پریس انفارمیشن ڈیپارٹمنٹ (پی آئی ڈی) کے افسر وقاص نقوی نے بتایا کہ حکومت پریس کلبوں کی بندش یا ان کے غیر فعال ہونے کے بارے میں کچھ نہیں کر سکتی۔ پریس کلب صحافیوں کا گھر ہے اور اسے فعال یا غیر فعال رکھنا ان کا کام ہے۔ انہوں نے واضح کیا کہ یہ صحافیوں کا کام ہے کہ وہ بیٹھ کر اپنے مسائل حل کریں۔ حکومت اس بارے میں کچھ نہیں کر سکتی۔