پاک بھارت جنگ کا خطرہ ٹلا نہیں کہ دونوں ملک دوبارہ جنگی عزائم کا اعادہ کر رہے ہیں جس کی ایک تازہ مثال پاک فضائیہ کی جانب سے جے ایف 17 تھنڈر لڑاکا طیاروں سے طویل فاصلے تک مار کرنے والے ملکی ساختہ میزائل کا کامیاب تجربہ ہے۔
پاکستان ایئرفورس کے ترجمان کے مطابق، جے ایف تھنڈر 17 طیاروں کو اب دن اور رات کے کسی بھی وقت پر اہداف کو نشانہ بنانے کی صلاحیت حاصل ہو گئی ہے۔
پاکستان ایئرفورس کے ترجمان نے مزید کہا، یہ تجربہ ملکی دفاع کے تناظر میں ایک عظیم سنگ میل کی حیثیت رکھتا ہے جو پاکستانی سائنس دانوں اور انجینئرز کی صلاحیتوں کا واضح اظہار ہے جنہوں نے جے ایف تھنڈر 17 لڑاکا طیارے کو ملکی سطح پر تیار کردہ جدید ترین میزائل ٹیکنالوجی سے لیس کیا ہے۔
اس کامیاب تجربے کے بعد اب مذکورہ لڑاکا طیارے کو دن کے کسی بھی وقت طویل فاصلے پر موجود اہداف کو نشانہ بنانے کی صلاحیت حاصل ہو گئی ہے۔
ایئر چیف مارشل مجاہد انور خان نے کہا ہے کہ پاکستان ایک امن پسند ملک ہے لیکن اگر دشمن نے ہم پر جارحیت مسلط کی تو ہم اس کا بھرپور جواب دیں گے۔