لاہور: سانس لینے کا حق کس سے مانگیں؟

لاہور میں اب موسم بدلنے کی خبر صرف درختوں سے نہیں ملتی۔ آنکھوں کی جلن، حلق کی خراش اور بچوں کی کھانسی بھی بتاتی ہے کہ سردیاں قریب ہیں۔ جس شہر کی صبح کبھی سیر کی دعوت تھی، وہاں گھر سے نکلنے سے پہلے ہوا کا حال دیکھنا پڑتا ہے۔ یہ کیسی ترقی ہے جس میں سڑکیں کشادہ ہوتی جائیں اور انسان کی سانس تنگ؟ شہر عمارتوں سے نہیں، زندہ انسانوں سے آباد ہوتے ہیں۔ اگر ان کی صحت مسلسل خطرے میں ہو تو ترقی کےدعوؤں کا حساب نئے سرے سے کرنا ہوگا۔

لاہور کی بدترین فضائی آلودگی کو سمجھنے کے لیے روزانہ کی عالمی درجہ بندی کافی نہیں۔ آئی کیو ایئر کے مطابق2025میں یہاں باریک آلودہ ذرات، یعنی پی ایم 2.5، کی سالانہ اوسط مقدار 88.9 مائیکروگرام فی مکعب میٹر تھی۔ یہ عالمی ادارۂ صحت کی سالانہ رہنما حد، 5 مائیکروگرام، سے تقریباً اٹھارہ گنا ہے۔ اسی سال دستیاب اعداد میں لاہور دنیا کا آٹھواں آلودہ ترین شہر تھا۔ کسی دن بڑے شہروں کی فہرست میں پہلے نمبر پر ہونا اور سال بھر کی درجہ بندی دو الگ باتیں ہیں۔ اصل المیہ یہ ہے کہ خطرہ چند خراب دنوں تک محدود نہیں۔[1]

انجینئر ارشد ایچ عباسی اور میں نے ستمبر 2025 کی مشترکہ تحریر میں سوال اٹھایا تھا کہ ماحولیاتی منصوبوں کے دعوؤں کو آزاد سائنسی جانچ اور عوامی جواب دہی سے کیوں نہیں جوڑا جاتا۔ توانائی کی پالیسی پر ہماری دوسری مشترکہ تحریر نے بھی فیصلوں کی معاشی اور ماحولیاتی قیمت کی طرف توجہ دلائی تھی۔[2][3]

اسی بحث کو عباسی صاحب نے 22 اکتوبر 2026 کے اپنے مضمون میں لاہور کی ہوا اور انسدادِ سموگ کے اخراجات کے حوالے سے آگے بڑھایا ہے۔[4] اب ضرورت اس سوال کو ہر شہری کا مطالبہ بنانے کی ہے: ہمارے نام پر خرچ ہونے والی رقم ہماری زندگی میں کیا بہتری لائی؟

آلودگی محض منظر کی خرابی نہیں۔ عالمی ادارۂ صحت کے مطابق بیرونی فضائی آلودگی دل اور سانس کی بیماریوں، فالج اور پھیپھڑوں کے سرطان سے منسلک ہے۔ بچوں کی صحت کو اس سے خاص خطرہ ہے۔[5] اس لیے سموگ کو صرف کھانسی، دھند یا ٹریفک کی دشواری سمجھنا اس کے اصل نقصان کو چھوٹا کرنا ہے۔ ہسپتال کا بل، کام سے غیرحاضری اور بچے کی چھُوٹی ہوئی تعلیم بھی اسی نقصان کے حصے ہیں، خواہ سرکاری حساب میں ان کی کوئی الگ مد نظر نہ آئے۔

اس بحران کا طبقاتی چہرہ بھی ہے۔ صاحبِ استطاعت گھرانہ ہوا صاف کرنے کا آلہ خرید سکتا ہے؛ دیہاڑی دار اپنی سانس محفوظ رکھنے کے لیے روزگار نہیں چھوڑ سکتا۔ سڑک کنارے کام کرنے والا مزدور، ٹریفک اہلکار اور موٹر سائیکل پر سامان پہنچانے والا نوجوان گھر میں رہنے کی ہدایت پر کیسے عمل کرے؟ سکول بند کرنے کا فیصلہ بھی سب بچوں پر یکساں اثر نہیں ڈالتا۔ جس گھر میں انٹرنیٹ اور الگ کمرہ میسر نہیں، وہاں آن لائن تعلیم کا اعلان محرومی کا علاج نہیں بنتا۔ صحت کا تحفظ آمدن کی سطح کا محتاج نہیں ہونا چاہیے۔

آئین کا آرٹیکل 9A ہر شخص کو صاف، صحت مند اور پائیدار ماحول کا حق دیتا ہے۔[6] اس حق کا عملی مطلب ہے کہ حکومت اپنے فیصلوں، بجٹ اور نفاذ کے ذریعے شہری کی حفاظت کرے۔ عدالت کے حکم کے بعد چند چھاپے اور اخباری تصاویر مستقل انتظام کا بدل نہیں بن سکتیں۔ ماحولیاتی تحفظ کو ترقیاتی منصوبوں کی آخری فائل سے نکال کر فیصلہ سازی کے آغاز میں رکھنا ہوگا۔ جو تعمیر آج سیاسی کامیابی سمجھی جاتی ہے، اس کی صحت اور ماحول پر قیمت بھی اسی وقت سامنے آنی چاہیے۔

صحیح علاج کے لیے آلودگی کے مختلف ذرائع الگ کرنا ضروری ہیں۔ عالمی بینک کی مارچ 2025 کی جائزہ دستاویز میں لاہور ڈویژن کی پی ایم 2.5 آلودگی میں گھریلو ذرائع کا حصہ 28 اور ٹرانسپورٹ کا 24 فیصد بتایا گیا ہے۔[7] یہ مخصوص جغرافیے اور طریقۂ تخمینے کے اعداد ہیں؛ انہیں ہر محلے اور ہر موسم کا مستقل تناسب سمجھنا غلط ہوگا۔ کسی ایک شعبے کو سارا مجرم بنا دینے سے باقی ذرائع کو چھوٹ مل جاتی ہے۔ پورے صوبے کے اخراج، شہری ہوا میں موجود ذرات اور سڑک کنارے کی پیمائش کو بھی ایک ہی چیز نہیں سمجھنا چاہیے۔

ہوا سرحدوں پر نہیں رکتی۔ علاقائی تعاون، مشترکہ تحقیق اور معلومات کا تبادلہ ضروری ہیں۔ عالمی بینک کی علاقائی حکمت عملی بھی اسی مشترک فضائی خطے کو سامنے رکھتی ہے۔[8] مگر بیرونی آلودگی ہماری اپنی ذمہ داری ختم نہیں کرتی۔ اپنے ہاں کچرا جلنے، دھواں چھوڑتی گاڑیوں اور آلودہ صنعتی عمل کو برداشت کرتے ہوئے سارا الزام پڑوسی پر ڈالنا مسئلے کو سیاسی بحث میں گم کرنا ہے۔ پاکستان اور بھارت کو ایک دوسرے کے خلاف بیانات کے ساتھ ساتھ اپنے شہریوں کے لیے قابلِ عمل ماحولیاتی تعاون کی راہ بھی نکالنی چاہیے۔

اعداد کی دیانت میں ایک اور اہم بات شامل ہے۔ عالمی بینک نے مارچ 2025 میں پنجاب کلین ایئر پروگرام کے لیے تیس کروڑ ڈالر کے قرض کی منظوری دی۔ اعلامیے میں دس سال میں پی ایم 2.5 میں 35 فیصد کمی کا ہدف بیان ہوا۔[9] تاہم تفصیلی جائزہ دستاویز اس وسیع ہدف اور موجودہ منصوبے کے اثر میں فرق کرتی ہے: لاہور ڈویژن میں اس منصوبے سے 2030 تک 2.3 مائیکروگرام فی مکعب میٹر کمی متوقع ہے۔ عوام کو دونوں باتیں صاف بتانا لازم ہیں۔ منظوری، رقم کا اجرا، خرچ اور نتیجہ الگ مرحلے ہیں؛ انہیں ایک کامیابی بنا کر پیش نہیں کیا جا سکتا۔

قرض منظور ہونے سے ہوا صاف نہیں ہوتی، لیکن کسی نسبتاً نئے منصوبے کو محض ایک خراب دن کی بنیاد پر ناکام بھی قرار نہیں دیا جا سکتا۔[10] انصاف کا تقاضا ہے کہ معلوم ہو کون سا کام کب مکمل ہونا تھا، کہاں تاخیر ہوئی اور کس پیمانے پر فائدہ جانچا گیا۔ بدعنوانی کا الزام ثبوت مانگتا ہے؛ ناقص ترجیحات، تاخیر اور غیر مؤثر خرچ پر سوال اٹھانے کے لیے شہری کو کسی فوجداری مقدمے کے فیصلے کا انتظار نہیں کرنا چاہیے۔ عوامی رقم کی جواب دہی معمول کا انتظامی فرض ہے۔

میری تجویز ہے کہ ہر سہ ماہی اخراجات اور نتائج کی مشترکہ رپورٹ شائع ہو۔ اس میں خریدی گئی مشینوں کے ساتھ ان کا استعمال، دیکھ بھال کا خرچ اور آزاد جانچ بھی درج ہو۔ ہوا میں بہتری کو موسم، بارش اور ہوا کی رفتار کے اثر سے الگ کرکے پرکھا جائے۔ نگرانی کے آلات ضروری ہیں، مگر ان کا فائدہ تب ہے جب ان کی اطلاع پر اخراج گھٹے۔ پانی کے چھڑکاؤ یا کسی دوسری نمایاں مہم کی کامیابی تصاویر سے نہیں، مناسب تقابلی پیمائش سے ثابت ہونی چاہیے۔

شہر کے اندر معلومات کی کمی بھی دور کرنا ہوگی۔ اسامہ احمد اور ان کے ساتھیوں کے لاہور پر تحقیقی مسودے نے محدود زمینی سینسر، سیٹلائٹ معلومات اور موسمی عوامل کو ملا کر زیادہ تفصیلی نقشہ سازی کا طریقہ پیش کیا ہے۔ ایسی تحقیق معاون ہو سکتی ہے، مگر تخمینہ مستند زمینی پیمائش کا متبادل نہیں۔ جامعات کو مقامی مسائل کی تحقیق کے وسائل ملیں اور شہریوں کو محلہ وار معلومات۔ عوامی ڈیٹا جتنا قابلِ جانچ ہوگا، سرکاری کارکردگی پر بحث اتنی ہی سنجیدہ ہوگی۔

علاج کا بڑا حصہ روزمرہ شہری انتظام میں ہے۔ ایسی قابلِ اعتماد بس سروس چاہیے جو گھر، کام اور تعلیمی ادارے کو جوڑے۔ محض بس خریدنا کافی نہیں؛ راستہ، وقت، کرایہ اور آخری پڑاؤ سے منزل تک رسائی اہم ہیں۔ ایندھن کی جانچ کا نتیجہ قابلِ نفاذ کارروائی بنے۔ صنعتی اخراج کے قواعد بااثر مالک اور چھوٹے کاروبار پر یکساں لاگو ہوں۔ کسان کو باقیات سنبھالنے کا قابلِ برداشت متبادل ملے۔ تعمیراتی گرد اور کچرا جلانے پر کارروائی پورا سال ہو۔ صفائی کے کارکنوں اور کھلے ماحول میں کام کرنے والوں کے تحفظ کو بھی باقاعدہ بجٹ ملنا چاہیے۔

لاہور کو بچانے کے لیے شہریوں سے صرف احتیاط کا مطالبہ کافی نہیں؛ فیصلہ کرنے والوں سے ذمہ داری مانگنا ہوگی۔ بچے کو کھلی فضا میں کھیلنے، مزدور کو صحت گنوائے بغیر روزی کمانے اور بزرگ کو بے خوف چہل قدمی کا حق ہے۔ یہ آسائشیں نہیں، ایک قابلِ رہائش شہر کی بنیادی شرطیں ہیں۔ حکمران اپنے منصوبوں کا افتتاح کرتے وقت یہ بھی بتائیں کہ ان سے کتنے لوگوں کی سانس آسان ہوئی۔ لاہور کی اصل خوب صورتی اسی دن واپس آئے گی جب صاف ہوا خریدنے کی چیز نہیں، سب کا حق بنے گی۔

 
[1] آئی کیو ایئر، 9 جون 2026؛ لاہور کے 2025 کے سالانہ اعداد اور عالمی درجہ بندی۔ ‏
[2] ڈاکٹر اکرام الحق اور انجینئر ارشد ایچ عباسی، Where Did The Climate Billions Go?، دی فرائیڈے ٹائمز، 13 ستمبر 2025۔ [‏
[3] ڈاکٹر اکرام الحق اور انجینئر ارشد ایچ عباسی، Faulty coal & LNG policies، بزنس ریکارڈر، 26 ستمبر 2025۔ ‏
[4] انجینئر ارشد ایچ عباسی، The Price Of Smog: Why Global Donors Must Hold Punjab Accountable For Lahore’s Air، دی فرائیڈے ٹائمز، 22 اکتوبر 2026؛ ان کی انفرادی تحریر۔ ‏
[5] عالمی ادارۂ صحت، Ambient (outdoor) air pollution  24اکتوبر 2024؛ صحت پر اثرات۔ ‏
[6] قومی اسمبلی، آئینِ پاکستان، 21 نومبر 2025 تک ترمیم شدہ متن، آرٹیکل 9A، مطبوعہ صفحہ 7۔ ‏
[7] عالمی بینک، Punjab Clean Air Program، Program Appraisal Document 10 مارچ 2025، رپورٹ PADHP00149، مطبوعہ صفحات 1 تا 2، پیراگراف 3 اور 8۔ ہدف میں موجودہ منصوبے کے متوقع اثر اور وسیع دس سالہ پروگرام میں فرق ملحوظ رہے۔ ‏
[8] عالمی بینک، Air Quality Management in the Indo-Gangetic Plains and Himalayan Foothills  9دسمبر 2025؛ مشترک فضائی خطے میں علاقائی تعاون۔ ‏
[9] عالمی بینک، پنجاب کی سموگ حکمت عملی کے لیے تیس کروڑ ڈالر قرض کا اعلامیہ، 28 مارچ 2025۔ قرض کی منظوری کو مکمل اخراجات یا حاصل شدہ نتائج نہ سمجھا جائے۔ [‏
[10] . اسامہ احمد، زبیر خالد، محمد طاہر اور مومن اپل، Spatiotemporal Air Quality Mapping in