Fri, November 08, 2024

Get Alerts

پاکستان سپر لیگ 9 کی ٹرافی کی رونمائی کر دی گئی

چیئرمین پی سی بی محسن نقوی نے کہا کہ آج پی ایس ایل ٹرافی کی رونمائی کی گئی ہے۔ امید ہے یہ ٹونامنٹ اچھا رہے گا۔ ہماری طرف سے تمام تیاریاں مکمل ہیں۔جو پاکستانیوں کا خواب ہے اسے پورا کرنے کی کوشش کریں گے۔ محنت نظر آئے گی۔

پاکستان سپر لیگ 9 کی ٹرافی کی رونمائی کر دی گئی
شیئر کریں:

پاکستان کرکٹ بورڈ نے لاہور میں پاکستان سپر لیگ ( پی ایس ایل) کے نئے سیزن کی ٹرافی کی رونمائی کردی ہے۔

پاکستان سُپر لیگ 9 کی ٹرافی کی تقریب رونمائی لاہور کے پولو گراؤنڈ میں منفرد انداز میں منعقد کی گئی۔ جہاں قومی اور بین الاقوامی گھڑ سوار ٹیمیں جھنڈے اٹھائے پنڈال پر پہنچیں۔

تقریب میں چیئرمین پی سی بی محسن نقوی سمیت تمام ٹیموں کے مالکان موجود تھے جب کہ خصوصی بینڈ نے بھی مختلف دھنیں بجاکر تقریب کو یادگار بنادیا۔

تقریب میں ملتان سلطانز کے کپتان محمد رضوان ،کوئٹہ گلیڈی ایٹرز کے کپتان سرفراز، کراچی کنگز کے کپتان شان مسعود اور پشاور زلمی کے کپتان بابر اعظم بھی شریک تھے۔ ٹرافی کو ’دی اورین ٹرافی‘ کا نام دیا گیا ہے۔

سلور رنگ کی اس ٹرافی کی دلچسپ بات یہ بھی ہے کہ اس پر ستارہ بنا ہوا ہے۔ جبکہ چمکیلی ٹرافی ڈیزائن کے حوالے سے بھی کافی دلچسپ ہے۔

تازہ ترین خبروں اور تجزیوں کے لیے نیا دور کا وٹس ایپ چینل جائن کریں

اس موقع پر چیئرمین پی سی بی محسن نقوی نے گفتگو کرتے ہوئے کہا کہ یہ اعلان کرتے ہوئے خوشی ہو رہی ہے کہ ایچ بی ایل پی ایس ایل اپنے نویں سیزن میں داخل ہو رہا ہے۔

انہوں نے کہا کہ آج پی ایس ایل ٹرافی کی رونمائی کی گئی ہے۔ امید ہے یہ ٹونامنٹ اچھا رہے گا۔ ہماری طرف سے تمام تیاریاں مکمل ہیں۔

محسن نقوی نے کہا کہ میں نے تاحال پوری طرح سے عہدہ نہیں سنبھالا ہے، مگر ٹیم سے تمام آگاہی لیتا رہتا ہوں۔

انہوں نے کہا کہ جو پاکستانیوں کا خواب ہے اسے پورا کرنے کی کوشش کریں گے۔ محنت نظر آئے گی۔ جب تک تمام ترصورتحال سے آگاہ نہیں ہوتا۔ تب تک کچھ نہیں کہہ سکتا۔خامیوں پر کام کرنے کی بھرپور کوشش کریں گے۔

اس موقع پر محسن نقوی نے تمام ٹیمز کے سربراہان کا بھی شکریہ ادا کیا جو کہ اس موقع پر موجود تھے۔

اس سے قبل 12 جنوری کو   پاکستان سپر لیگ کے نویں ایڈیشن کے شیڈول کا اعلان کیا گیا تھا جس کا آغاز 17 فروری کو لاہور سے دفاعی چیمپیئن لاہور قلندرز اور اسلام آباد یونائیٹڈ کے درمیان میچ سے ہو گا جبکہ ایونٹ کا فائنل کراچی میں کھیلا جائے گا۔

پاکستان سپر لیگ کے نویں ایڈیشن کے میچز 4 شہروں کراچی، لاہور، ملتان اور راولپنڈی میں کھیلے جائیں گے اور ایونٹ کا فائنل 18 مارچ کو کراچی کے نیشنل بینک سٹیڈیم میں ہوگا۔

34 میچوں پر مشتمل اس ٹی20 ٹورنامنٹ میں کراچی سب سے زیادہ 11میچوں کی میزبانی کرے گا جن میں کوالیفائر، دو ایلیمینیٹرز اور فائنل شامل ہیں۔

لاہور کا قذافی سٹیڈیم اور راولپنڈی کا پنڈی کرکٹ سٹیڈیم 9، 9 میچز کی میزبانی کریں گے جبکہ ملتان میں پانچ میچز کھیلے جائیں گے۔

ٹیگز: پاکستان کرکٹ بورڈ, لاہور, پاکستان سپر لیگ, پی ایس ایل, سیزن, ٹرافی, پی سی بی, محسن نقوی

نیا دور