پارٹی ذرائع کے مطابق پی ٹی آئی کے مرکزی رہنما شعیب صدیقی نے پاکستان مسلم لیگ ن میں شمولیت اختیار کر لی ہے۔ مسلم لیگ ن کی جانب سے شعیب صدیقی کو آئندہ انتخابات میں پارٹی ٹکٹ بھی دیا جائے گا۔
دوسری جانب شعیب صدیقی کی جانب سے جاری بیان میں کہا گیا ہے کہ پنجاب کی موجودہ حکومت تحریک انصاف ہی نہیں، وزیراعظم عمران خان کیلئے بھی باعث ندامت ہے۔ جن اصولوں کیلئے پی ٹی آئی نے جدوجہد کی، پنجاب حکومت نے اُن کی دھجیاں اڑا دیں۔
شعیب صدیقی کا کہنا تھا کہ پنجاب میں کرپشن اور اقربا پروری انتہا پر ہے۔ کوئی کام رشوت کے بغیر ممکن ہی نہیں ہے۔ صوبے میں تمام انتظامی عہدے پیسوں کے لین دین سے دیے جا رہے ہیں۔
پی ٹی آئی کے سابق سیکرٹری جنرل پنجاب کا کہنا تھا کہ صوبے بھر میں لیاقت اور دیانتداری کا کوئی معیار نہیں ہے۔ معیار صرف اور صرف رشوت ہے۔ اس وزیر اعلیٰ کا پی ٹی آئی کی تحریک، کارکنوں اور منشور سے دور کا بھی تعلق نہیں ہے۔
ان کا کہنا تھا کہ 4 سال بعد بھی وزیراعلیٰ کو علم ہی نہیں کہ کس کارکن نے پی ٹی آئی کیلئے کیا قربانیاں دیں؟ قربانیاں دینے والے کارکنوں کو پنجاب حکومت نے یکسر نظر انداز کر دیا۔ موجودہ بحران صرف اور صرف بزدار حکومت کی نااہلی اور نالائقی کا نتیجہ ہے۔
ان کا کہنا تھا کہ اس بحران کا آغاز 4 سال قبل بزدار کے وزیراعلیٰ بننے سے شروع ہوا۔ جتنا نقصان بزدار حکومت نے پی ٹی آئی اور عمران خان کو پہنچایا، ساری اپوزیشن مل کر بھی نہیں پہنچا سکی۔ عبدالعلیم خان اور اُن کے ساتھیوں نے جتنا کام پی ٹی آئی کیلئے کیا اس کے سب معترف ہیں۔ عبدالعلیم خان 8 برسوں تک حکومت وقت کا ڈٹ کر مقابلہ کرتے رہے۔ وہ کسی دباؤ کو خاطر میں نہیں لائے اور پارٹی کیلئے بھرپور خدمات سر انجام دیں۔
شعیب صدیقی کا اپنی گفتگو میں کہنا تھا کہ صرف عبدالعلیم خان ہی نہیں پارٹی کے تمام مخلص کارکنوں اور لیڈر کے ساتھ یہی سلوک کیا، موجودہ حالات میں پی ٹی آئی کا کوئی کارکن،ایم پی اے و ایم این اے پنجاب حکومت سے مطمئن نہیں، سب کے سب پی ٹی آئی کے نقصان کا ذمہ دار بزدار حکومت کو قرار دیتے ہیں۔
